Cursas da snowboard a Scuol - Bormolini e Krol-Walas gudognan a Scuol

Quai cun las cursas da chasa è in zichel ina roba. Atletas ed atlets vulan gist qua mussar lur meglras prestaziuns. Els vulessan gugent festivar plazzas da podest en l’atgna patria. Là suenter grond è era il squitsch sin atletas ed atlets. Sche il quint va si alura è quai ina bellezza da festivar ensemen cun amias ed amis en la stretga patria, sche betg, alura è qua ina gronda dischillusiun.

Cuppa mundiala da snowboard alpin a Scuol

Tar las cursas da la cuppa mundiala da snowboard alpin a Scuol na han atletas ed atlets svizzers betg savì persvader. Ladina Caviezel sco sisavla è rangada il meglier da las svizras ed ils svizzers che eran a la partenza a Scuol.

Tar ils umens èn Gian Casanova e Dario Caviezel restads pitgads en ils otgavelfinals. Els han terminà la cursa che Maurizio Bormolini da l’Italia ha gudagnà sin las plazzas 11 e 15. E tar las dunnas èn Ladina Caviezel e Flurina Bätschi crudadas or da la decisiun en il quartfinal e termineschan la cursa sin las plazzas 6 e 7. La cursa da la dunnas ha gudagnà la Polaca Aleksandra Krol-Walas.

L’indigena Larissa Gasser era schon sgulada or da la decisiun en la qualificaziun.

Greva stagiun per Larissa Gasser

Il november aveva Larissa Gasser da Madulain stgarpà dus bindels e mez dal pe. Ella ha fatg in faus pass ed è crudada. Gia suenter paucs dis è ella dentant puspè stada en il calzers da snowboard e pauc suenter sin pista. Via cuppa d’Europa as ha ella cumbattida enavos en la cuppa mundiala da snowboard alpin. L’atleta da ventgaset onns ha pudì ir a la partenza da las cursas il december a Tavau ed il schaner a Scuol. Dentant suenter paucs muments en la cursa da qualificaziun è Larissa Gasser crudada ora ed ha uschia stuì emblidar las cursas da final. Tuttina è ella cuntenta da puspè esser enavos sin il snowboard suenter sia ferida. La qualificaziun pel campiunadi mundial ch’è alura il mars en sia stretga patria da l’Engiadina Auta è sia gronda finamira.

Adina l’entschatta da schaner s’entaupa l’elita dal sport da snowboard alpin a Scuol per cursas da la cuppa mundiala. Durant l’entir enviern datti duas destinaziuns nua che las atletas ed ils atlets as pon mesirar sin livel da la cuppa mundiala. Il december a Tavau, e sco menziunà il schaner a Scuol. La pista da Prui sur Ftan è la pista da chasa dal campiun olimpic Nevin Galmarini ed uschia è cler ch’ils atlets e las atletas svizras vulan gist a qua far ina buna figura.

Set svizras e svizzers a la partenza

Da quels èn tschintg dunnas e dus umens. Las pli grondas schanzas sin ina plazza da podest pon ins spetgar da Flurina Baetschi ch’era vegnida terza a Tavau e da Dario Caviezel ch’è vegni segund a Tavau. Uschia sper’ins en la regiun sin l’emprima victoria svizra da questa stagiun en il snowboard alpin. En la patria da Nevin Galmarini eran gia ils frars Cla e Fadri Mosca vegnids gronds. Omadus han gia pudì gudagnar medaglias tar campiunadis mundials.  

Il program da las radund 100 atletas ed atlets che vegnan ad esser a la partenza tar la cuppa mundiala da snowboard a Scuol èn la sonda avantmezdi l’emprim las cursas da qualificaziun. Il suentermezdi a partir da las 13.00 spetgan lura il otgavelfinal, il quartfinal e las cursas da final.