La cursa da passlung en Engiadina «La Diagonela» è enconuschenta per sia purschida en il stil classic. Uss s’è l’organisaziun messa ensemen cun la cursa existenta en il stil liber, numnada «La Sfida».
Nus essans grats da pudair collavurar cun la glieud da «La Sfida» per pudair sviluppar vinavant il passlung en l’Engiadina
Cun porscher ina cursa er la dumengia, saja l’event pli attractiv per ils differents partenaris ed er per las passlungistas e passlungists, uschia ha ditg Ramun Ratti.
Profitar da sinergias
Enfin uss faschevan part trais cursas da passlung al program, quest onn suonda ina quarta la dumengia:
Sonda
- «La Pachifica»(25 km) Puntraschignia – Schlarignia – S-chanf – Zuoz Cumün
- «La cuorta» (6 km) Zuoz Resgia – S-chanf – Zuoz Cumün
- «La Diagonela» (55 km) Puntraschignia – San Murezzan – Puntraschignia – Zuoz
Dumengia
- «La Sfida» (28 km) Zuoz – Silvaplana/Surlej
Organisatoricamain possian els profitar da la savida ed er far quint cun ils numerus voluntaris ch’èn s’engaschads gia ils ultims onns a favur da la Sfida. En tut lavuran circa 250 voluntaris per las quatter cursas da passlung en Engiadin’Ota.
