Il podest:
- 1. Victor Koretzky (FRA) 1:20.23
- 2. Nino Schurter (SUI) + 0.02
- 3. Mathias Flückiger (SUI) + 0.23
Nino Schurter ha mussà ina fitg ferma cursa ed è adina stà en la gruppa da testa. En la davosa da sis rundas ha il mountainbiker oriund dat Tersnaus attatgà pliras giadas. La finala ha el pers il sprint final cunter il Franzos Victor Koretzky ch'aveva gia battì Nino Schurter en in sprint final il venderdi en la cursa da short track.
Resultats cursa da cross country dals umens
En la cursa roiala è Koretzky adina stà sin ils chaltgogns a Schurter, n’ha dentant mai manà la cursa ed uschia fatg tempo. Cun questa tactica ha il Franzos festivà sia emprima victoria en la cuppa mundiala. Da l'auter maun sto Nino Schurter spetgar vinavant sin sia 33avla victoria per uschia egualisar il record da la legenda franzosa Julien Absalon.
Dus Svizzers sin il podest
Cumplettà il podest sco terz ha cun Mathias Flückiger in ulteriur Svizzer. Flückiger, il victur da la davosa cursa ad Albstadt il 2019, ha ina giada dapli demonstrà sia buna furma. Il Bernais aveva dacurt prendì part al Tour de Romandie ed uschia fatg il viadi ad Albstadt pir il venderdi.
Persvadì ha er Thomas Pidcock. Il Brit ch’ha er gia festivà divers success sin via è vegnì 5avel, quai cun il numer 100. Cun Mathieu van der Poel ha dentant il grond favurit stuì magunar ina pitschna terrada. L’Ollandais ch’aveva gudagnà la cursa da short track è vegnì be 7avel. L’auter favurit, il Brasilian Henrique Avancini, ha stuì sa cuntentar cun il 10avel plaz ed è uschia stà classà dus plazs avant il terz Svizzer, Thomas Litscher.
Vital Albin en ils top 30
Ina buna prestaziun ha er mussà Vital Albin. Tar sia emprima cursa da la cuppa mundiala en la categoria d’elita è il mountainbiker da Tersnaus vegnì 29avel. El ha pers bun quatter minutas sin il victur Victor Koretzky. Andrin Beeli da Sagogn ha pers bunamain nov minutas ed è vegnì 75avel ed Ursin Spescha è vegnì 101avel cun in retard da passa 16 minutas.
Resultats cursa da cross country da las dunnas
Franzosas ina classa per sa sezzas
En la cursa da cross country da las dunnas han las Franzosas festivà ina victoria dubla. La giuvna Loana Lecomte ha gudagnà a moda suverana avant la campiunessa mundiala Pauline Ferrand-Prévot, quai cun in avantatg da bunamain ina minuta. Per Loana Lecomte èsi gia la segunda victoria en sia terza cursa cun l'elita. Cumplettà il podest sco terza ha l’Americana Haley Batten ch'ha la finala anc laschà davos ella sia cumpatriota Kate Courtney.
Indergand meglra Svizra
Meglra svizra è vegnida Linda Indergand dal chantun Uri. Ella ha pers bun duas minutas sin la Franzosa Loana Lecomte ed è vegnida 7avla. Gia en la cursa da short track aveva Lindergand persvadì cun il segund plaz. Cun Sina Frei sco 10avla è anc ina segunda Svizra classada sut las top 10. Jolanda Neff ha stuì sa cuntentar cun il 13avel plaz. Suenter ina buna partenza ha Neff dentant pers bler temp ed intginas posiziuns en la segunda part da la cursa.
La proxima cursa, la segunda da sis cursas da la cuppa mundiala da questa stagiun, è gia la proxima fin d’emna a Nove Mesto en Tschechia.
