Campiunadi svizzer Silvaplauna - Roman Furger e Nadine Fähndrich gudognan cursas roialas

Ils organisaturs da las davosas cursas da passlung da l’enviern han fatg gronds sforz per pussibilitar las cursas dal campiunadi svizzer a Silvaplauna. Ed ils organisaturs ed ils fans dal sport da passlung èn vegnids remunerads. Tar il campiunadi svizzer a Silvaplauna ha quai anc ina giada dà cursas perfetgas cun victuras e victurs che meritan quest titel.

Roman Furger per exempel ha terminà sia davosa cursa da la stagiun cun il titel da campiun svizzer sur 50 kilometers. Toni Livers da Trun, ch’ha terminà sia carriera activa avant dus onns è vegni segund. E sco meglier engiadinais è Curdin Räz da Segl rangà sin plazza sis.

Tar las dunnas ha la gronda favurita Nadine Fähndrich gudagnà il titel sur 30 kilometers. La victura dal Maraton da skis engiadinais Giuliana Werro è vegnida terza.

Buns resultats ha quai er dà per ils giuvens indigens:

Fabrizio Albasini da San Murezzan è vegni segund da la cursa sur 30 kilometers en la categoria U20, e Niclas Steiger da Samedan è vegni terz.

Isai Näff da Sent è vegni segund tar la cursa da 20 kilometers U18. E Marina Kälin da San Murezzan ha gudagnà la cursa en la categoria U20 avant Fabienne Alder da Puntraschigna.

Ils campiuns svizzers da sprint èn Erwan Käser e Nadine Fähndrich

Nadine Fähndrich ed Erwan Käser han accumpli lur rollas da favurits. Els tutgavan tutgavan tar ils favurits dal campiunadi svizzer a Silvaplauna. Ed ils favurits han accumplì lur rollas. Tar ils campiunadis svizzers a Silvaplauna han els gudagnà il titel tar l’elita. Valerio Grond da Tavau è vegnì segund. E Giuliana Werro da Zernez quarta.

Victorias indigenas ha quai dà en la categoria sut 18 onns nua che Ilaria Gruber da Silvaplauna ed Isai Näff da Sent han gudagnà il titel. Ed en la categoria dunnas sut 20 onns, nua che Marian Kälin da San Murezzan è la nova champiunessa svizra dal sprint.

La sonda spetgan a Silvaplauna las cursas da distanza. Las dunnas curran lura sur 30, ils umens sur 50 kilometers.

150 passlunghistas e passlunghists curuneschan campiunessas e campiuns

Nadine Fähndrich ha gì ina stupenta stagiun. La spezialista dal sprint ha manchentà la culla da cristal en questa disciplina be per set puncts. Ella è vegnida segunda. Il classament general da passlung ha ella terminà sco tschintgavla. Quai è stà il meglier resultat da si'entira carriera. Nadine Fähndrich vala sco gronda favurita tar las cursas da las dunnas. Tar ils umens tutgan Valerio Grond da Tavau e Janik Riebli dal chantun Sursilvania tar ils favurits.

Impressiuns da Silvaplauna

Pli gronda delegaziun dal center da passlung Engiadina Nordic

Las cursas a Silvaplauna èn las cursas da chasa da las atletas ed ils atlets dal center da passlung Engiadina Nordic. Passa 20 passlunghistas e passlunghists engiadinais èn da la partida. Uschia per exempel era la victura dal Maraton da skis engiadinais, Giuliana Werro da Zernez, u Marina e Nadja Kälin da San Murezzan. U alura er Curdin Räz da Segl, il victur da la cursa da notg da Segl a Puntraschigna.