Andres Ambühl è en tut ils reguards um da record. Nagin’auter ha dà uschè bleras partidas en la pli auta liga da hockey svizra sco il Grischun – totalmain 1'322 gieus.
Nagin’auter ha dà uschè bleras stagiuns en il dress dal HCD – totalmain 21 stagiuns. Las ultimas 11 stagiuns sco chapitani. E nagin auter ha giugà uschè blers campiunadis mundials da hockey en il dress da l’equipa naziunala – en tut 19 giadas. E nagin auter giugader svizzer è vegnì onurà dals fans en Svizra sco meglier giugader da la liga naziunala – otg giadas han ils fans declerà el sco pli impurtant giugader.
Sin il glatsch a Tavau sa serra il circul
La stagiun 2000/2001 ha Andres Ambühl pudì dar las emprimas partidas en liga naziunala A per il HCD. 25 onns pli tard e cun sis titels da campiun svizzer cun il HCD ed ils ZSC Lions è ida a fin en ils mezfinals dals playoff cunter ils ZSC Lions la grondiusa carriera dal leader grischun. Gugent avess Andres Ambühl giugà anc ina ulteriura partida encunter sia segunda amur en Svizra. La ferma equipa da Turitg ha dentant terminà la carriera dal hockeyaner d’excepziun la saira da gievgia, ils 10 dad avrigl 2025.
Andres Ambühl e Marc Wieser din adia
-
Bild 1 von 3. Suenter la davosa partida, Andres Ambühl e Marc Wieser. Bildquelle: RTR.
-
Bild 2 von 3. Il HCD cun Ambühl e Wieser di adia als fans. Bildquelle: RTR.
-
Bild 3 von 3. Standing ovations dals fans per «lur» HCD. Bildquelle: RTR.
In che n’ha mai tschertgà la glisch dal reflectur
Er suenter tut ils success che Andres Ambühl ha cuntanschì sco giugader da hockey è el restà cun ils pes per terra. Adina ha el mess la prestaziun da l’equipa en il center. Er a la fin da sia lunga carriera. Losch sin tut quai ch'el ha cuntanschì, dentant senza perder ina larma da cordoli, ha Andres Ambühl prendì cumià da ses fans. E quels din: Grazia fitg per tut, «Büehli».
