Sco gia al campiunadi mundial da kata l’entschatta october a Londra vegn Simon Zurfluh da Castrisch era segund al campiunadi svizzer a Flem. En la runda finala han mancà be 0,2 puncts per gudagnar ed uschia far revantscha encunter Ramon Pfändler dal chantun Son Gagl ch’era daventà a Londra campiun mundial. Betg sa participà al campiunadi svizzer a Flem è il terz dal campiunadi mundial, Florian Zurfluh, il frar schumellin da Simon, ch’abitescha en la vischinanza da Rotterdam en l’Ollanda.
Simon Zurfluh ha persvadì al campiunadi svizzer da chasa davent da l'entschatta. En l’emprima runda è el stà il meglier ed ha uschia survegnì ils blers puncts dals tschintg experts. Er en la segunda runda ha el mussà la meglra prestaziun durant questa kata u coreografia che cuzza tranter ina e duas minutas. En la runda finala cun ils megliers otg ha ses collega Roman Pfändler, che trenescha cun Simon Zurfluh en il Dojo Wettingen, però mussà ina reacziun e battì piz a cup il Sursilvan. Il karateka songagliais ha uschia era pudì defender ses titel dal 2023. Vegnì terz a Flem tar ils umens d'elita è Bekzhan Altaev da Cuira.
Tar las dunnas d’elita hai dà in triumf total per las karatekas che derivan or dal Dojo a Glion. Gudagnà il titel da campiunessa svizra en questa furma da cumbat kata ha Alanis Schönenberger (Glion) avant Angela Egli (Cuira) e Fabia Frank (Glion).
Impressiuns dal campiunadi svizzer da kata a Flem
-
Bild 1 von 8Legenda: da san. Simon Zurfluh (2.) ed il campiun svizzer da kata Ramon Pfändler RTR
-
Bild 2 von 8Legenda: Simon Zurfluh pront per sia kata finala. RTR
-
Bild 3 von 8Legenda: Simon Zurfluh (san.) vi da sa preparar cun ses collegas per la concurrenza da team. RTR
-
Bild 4 von 8Legenda: Forza, prezisiun, dinamica, spertadad – tut sto constar per triumfar. RTR
-
Bild 5 von 8Legenda: Las meglras cumbattantas da kata en Svizra. Da san. Angela Egli (2.), Alanis Schönenberger (1.) e Fabia Schönenberger (3.) RTR
-
Bild 6 von 8Legenda: Il podest dals umens d'elita cun Simon Zurfluh da Castrisch sin il segund plaz. RTR
-
Bild 7 von 8Legenda: Avant la concurrenza èn vegnids preschentads tut ils karatekas che cumbattan per il titel da campiun svizzer. RTR
-
Bild 8 von 8Legenda: Cumbattantas e cumbattants da karate vi da sa preparar e sa focusar sin lur preschentaziuns. RTR
Aur per Simon Zurfluh hai dà en la concurrenza da team che consista ord trais cumbattants da karate. A quai team dal Dojo Wettingen ha era Ramon Pfändler fatg part. Al campiunadi mundial a Londra avevan ils dus frars Zurfluh ensemen cun Pfändler medemamain gudagnà aur ed uschia il titel da campiun mundial en questa disciplina.
Mak Osmic daventa campiun svizzer dals juniors
Sin buna via da daventar in dals megliers cumbattants da karate è Mak Osmic da Laax. A Flem, quasi tar el avant chasa, ha il giuven da 15 onns festivà ses proxim success ed è daventà campiun svizzer dals juniors en la furma da cumbat kata. Mak Osmic aveva gia astgà sa participar l'october per l'emprima giada als campiunadis mundials a Londra. Là era il giuven sursilvan vegnì 9avel en la categoria U19. Cun Renato Flores sco quart ha anc in ulteriur giuven dal Dojo Glion persvadì al campiunadi svizzer a Flem.
Tar las junioras è Nora Veraguth da Sagogn vegnida 5avla. Plinavant ha Nina Vonesch, medemamain commembra dal Dojo Glion, terminà il campiunadi svizzer da kata sin il 8avel plaz. Gudagnà tar las junioras ha Vanessa Wang dal Club da karate Strengelbach.