Campiunadi mundial - Karate-Kids rumantschs sut ils top 10

Kohai Mak e Kohai Nora, ils dus scolars da la Surselva èn sa mesirads al campiunadi mundial da kata a Londra. Entaifer il sport da cumbat da karate è quai ina furma da cumbatter en il vid, senza contact cun ina persuna adversaria. Ils sportists han d’absolver ina tscherta coreografia, sumegliant ad in saut. Ina tala preschentaziun po cuzzar pli ch’ina minuta. Il cumbat imaginar pretenda precisiun, forza, spertadad, concentraziun e cundiziun. En lur emprima concurrenza èn ils dus sportists giuvens sa rangads en ils top 10. Nora Veraguth è daventada 5avla en la categoria U15 e Mak Osmic 9avel en la categoria U18.

Mak Osmic da Laax

Mak Osmic ha 15 onns, è da chasa a Laax, ed ha cumenzà a far karate gia avant ch’el aveva sis onns. Il giuven da Laax è cunzunt vegnì inspirà da ses geniturs ed era dal tat, tuts gronds fans dal sport da cumbat che deriva dal Giapun. Durant ils davos bun 10 onns ha Mak gia festivà divers success. Ed el investescha era fitg bler temp en quest sport ch’è dapli che be in hobi. En vista al campiunadi mundial ha Mak Osmic frequentà fin quatter trenaments ad emna, la gronda part en il dojo a Glion nua ch’i vegn cunzunt fatg il karate kyokushinkai. Quest onn festivescha il dojo da karate a Glion ses 25avel anniversari. Actualmain treneschan là radund 65 karatekas, uffants e creschids.

Nora Veraguth da Sagogn

Nora Veraguth ha 14 onns e viva cun sia famiglia a Sagogn. Cur ch'ella aveva 9 onns ha ella cumenzà a far karate. A la tschertga d'in sport da sa defender ha ella scuvert cun ses bab il karate, ch'els fan anc oz ensemen. Nora trenescha trais giadas ad emna en il dojo a Glion. Trenaments intensivs e strentgs che cuzzan mintgamai 90 minutas. En il karate datti pliras disciplinas. La preferida da Nora è kata. Quai fa ella spezialmain gugent ed era spezialmain bain. A turniers naziunals è sia precisiun e movibladad crudada si ed ella è vegnida selecziunada per il campiunadi mundial a Londra. En sia categoria è Nora Veraguth la suletta Svizra a quests mundials. Ch'ella dastgia sa preschentar sin quella gronda tribuna saja l'emprim stà ina surpraisa. Nora Veraguth vesa questa aventura sco experientscha, ma il medem mument vul ella er avisar in bun resultat.

Success per il dojo a Glion

En las localitads da karate a Glion dat in mantun trofeas, buccals e medaglias perditga dals success dals karatekas sursilvans, quai en las disciplinas kihon, kata e kumite. L’onn 2011 è tranter auter Mirco Furger da Cumbel daventà campiun svizzer dals juniors ed era l’equipa dal dojo Glion era turnada quai onn cun la medaglia d’aur. Oz, 13 onns suenter quest success, maina Mirco Furger il dojo a Glion. Il Lumnezian porta gia daditg la tschenta naira, el è expert cun il titel da sensai. Mirco Furger fa era part da la Federaziun svizra da karate.

Or da l'archiv: