Cun set onns ha Simon Zurfluh, oriund da Castrisch, cumenzà a far karate en il dojo a Glion, quai er pervia dals geniturs ch’han animà el da far insatge en il temp liber dasper la scola. E suenter l’emprima lecziun èsi stà cler, quai èsi. Il giuven sursilvan leva il pli gugent gia posseder immediat in tenu da karate e la tschinta naira. Oz tutga Simon Zurfluh tar ils megliers dal mund, quai en las disciplinas kata, ina coreografia da cumbat senza contact, e kumite, in cumbat cunter in adversari. Per esser sin quest nivel tranescha el savens fin tschintg giadas ad emna.
Quels davos 21 onns ch’jau fatsch karate n’hai jau mai laschà or il trenament dapli che duas emnas.
L’entschatta d'october ha Simon Zurfluh festivà il pli grond success da sia carriera. Al campiunadi mundial da kata a Londra ha el gudagnà aur cun il team ed argient en la concurrenza singula. Per il giuven da 28 onns è uschia ì en vigur in siemi. Ussa spetga il campiunadi svizzer a Flem e suenter il success a Londra datti là be ina finamira: gudagnar aur. Malgrà quest success, viver dal karate, n’è betg pussibel.
Il trenament da karate è er in scappar dal mintgadi. E quest sport ha era gidà mai en scola ed en mia professiun. Grazia al karate hai jau emprendì da ma focussar sin quai ch’jau fatsch il mument.
Mes frar schumellin è ina part da mai
Simon Zurfluh ha in frar schumellin, il Florian che fa medemamain karate sin fitg aut nivel. Passa 20 onns èn els dus ids la medema via. Omadus han er frequentà il gimnasi a la scola claustrala a Mustér e silsuenter studegià a la Scola politecnica a Turitg, Simon informatica e Florian fisica. Avant paucs onns èn las vias però sa separadas. Simon Zurfluh è restà a Turitg, nua ch'el lavura sco inschigner da software tar la firma Ergon e ses frar schumellin ha bandunà la Svizra e viva oz en la vischinanza da Rotterdam en l’Ollanda.
L’emprim mument èsi stà grev d’acceptar che mes frar schumellin va ussa sia atgna via e ch’el è lunsch davent da mai.
Durant il temp da corona ha Simon Zurfluh era emprendì d’enconuscher sia dunna Michelle che deriva da la Columbia, quai online sur l’internet. Anc durant il temp da corona e suenter bleras brevs electronicas e telefons ha il giuven sursilvan fatg il viadi en la Columbia per s'inscuntrar cun ella l’emprima giada. I saja stà amur davent da l’entschatta intgins onns pli tard è Michelle lura vegnida en Svizra. Il 2023 han els maridà.
Impressiuns da Simon Zurfluh
-
Bild 1 von 4Legenda: Simon Zurfluh lavura sco inschigner da software tar la firma Ergon a Turitg mad -
Bild 2 von 4Legenda: Simon Zurfluh durant ina concurrenza da kata nua ch'i vegn preschentà in coreografia durant 1-2 minutas mad
-
Bild 3 von 4Legenda: Il trio cun ils dus schumellins Simon e Florian Zurfluh è daventà l'october a Londra en la concurrenza da team campiun mundial en la disciplina kata. mad
-
Bild 4 von 4Legenda: Simon Zurfluh ch’abitescha oz a Regensdorf en il chantun Turitg sin visita tar ils geniturs a Castrisch. RTR