Nagin exploit dals ciclists Svizzers en la cursa cross country al campiunadi europeic da MTB en la Rumenia. En absenza da Nino Schurter e Mathias Flückiger è Filippo Colombo daventà sco 8avel meglier Svizzer. Campiun europeic è daventà il Talian Simone Avondetto. Tar las dunnas ha gudagnà l'Ollandaisa Pöck Pieterse.
En ina cursa cun cundiziuns difficilas, al campiunadi europeic en la Rumenia è la Svizra Nicole Koller daventada quarta en la cursa cross country. Var ina minuta a mancà a Koller per rang 3 che la Tudestga Nina Benz a fatg.
Hutter fa bronz cun la squadra svizra
Al campiunadi europeic da mountainbike en la Rumenia ha la squadra svizra gudagnà la medaglia da bronz en la cursa da staffetta, il Team Relay. Cun Anina Hutter è era ina Grischuna stada participada vi dal success.
Cun ils leaders Thomas Litscher e Ramona Forchini ha la squadra svizra pers 55 secundas sin la squadra victura da l'Italia. 26 secundas han mancà per il segund plaz da la squadra franzosa.
A la partenza per la Svizra èn stads ils bikers da la categoria elita Thomas Litscher e Ramona Forchini, lura l’U23 Finn Treudler, ed il junior e las junioras Nicolas Halter, Anina Hutter e Muriel Furrer. Betg da la partida tar il campiunadi europeic en la Rumenia èn Nino Schurter, Mathias Flückiger, Alessandra Keller e Jolanda Neff.
La cursa dad aur al campiunadi mundial 2023:
Aur ed argient da cross country U23
Aur ed argient per la Svizra en la cursa da cross country U23. Finn Treudler è daventà campiun europeic avant Luke Wiedmann. Bronz ha fatg il Franzos Luca Martin. La bilantscha extraordinaria svizra ha cumplettà Dario Lillo sco quart.
Gia medaglia svizra en il short track
Al cumenzament dal campiunadi europeic ha la Svizra Nicole Koller fatg bronz en la cursa short track. La Turitgaisa è arrivada sin il podest, davos las duas favuritas Pauline Ferrand-Prévot da la Frantscha e Puck Pieterse dals Pajais Bass. Per Koller èsi l'emprima medaglia tar in campiunadi europeic en la categoria elita.
Tar ils umens ha Lars Forster sco 5avel procurà per la meglra rangaziun svizra. Aur ha fatg il Danais Simon Andreassen, avant il Tudestg Julian Schelb ed il Talian Luca Braidot. Il Svizzer Filippo Colombo ha dà si anc en l'emprima mesadad da la cursa.
