La Festa da lutga federala è quest onn il punct culminant da mintga lutgader. E daventar il proxim retg è segir era la finamira dad Armon Orlik. Per meglierar sias schanzas ha el decis avant dus onns da midar ses conturn. El ha fatg midada da Maiavilla a Jona en il chantun Son Gagl – e trenescha là ses corp sut la batgetta da l'Engiadinais Robin Städler. Armon Orlik ha vulì far questa midada per dar nov schlantsch a ses agen trenament, e per augmentar anc in zic la qualitad da quel.
Il trenader engiadinais è da chasa a Jona. Qua ha Robin Städler dapi blers onns ses center da fitness «Sypoba». En sia carriera è el tranter auter era stà trenader atletic tar Swiss Ski ni tar il HCD, sco era trenader persunal da differents atlets svizzers da renum. Per exempel dal goli da hockey Jonas Hiller, dal lutgader Jörg Abderhalden ni da la patinadra artistica Sarah Meier.
Durant in trenament na faschain nus quasi naginas pausas. Il corp vegn stanchel e cumenza a tremblar. Pir lura cumenza en sasez la lavur da trenament.
En il trenament vai per la lavur en la stancladad
En il sistem da trenament da Robin Städler vai per far ils exercizis senza grondas pausas. Il trenader fa vegnir stanchel ses atlets e cura che l’entir corp cumenza a tremblar, lura giaja quai bler pli profund en la musculatura. Pir lura cumenza el la lavur. Suenter ils emprims trenaments cun Robin Städler era il lutgader Armon Orlik plat. Plaunsieu è el dentant s'endisà vi da l’intensitad. La finamira è sa chapescha da vegnir anc in zic meglier en tut ils resguards. Ina forza enorma, buna atletica e tecnica haja Armon Orlik gia. Uss giaja anc per lavurar vi dals davos in u dus pertschients.
Dapi 2023 novas vias
Cun midar da Maiavilla a Jona en il chantun Son Gagl trenescha Armon Orlik cun ils ferms lutgaders dal Toggenburg, quai èn Damian Ott, Werner Schlegel e Marcel Räbsamen. Uschia è garantida ina auta qualitad da trenament per che Armon Orlik po far il proxim pass: Vegnir anc meglier.
