La presidenta dal Cussegl federal, Viola Amherd, ha discurrì avant las medias davart la solidaritad envers l'Ucraina. La Svizra veglia sustegnair la reconstrucziun da l'Ucraina ed organisar ina conferenza da pasch. Uschia veglia la Svizra far sia part per ina pasch durabla.
Ils detagls per ina conferenza stoppian dentant anc vegnir sclerids en detagl. Responsabel saja il departament da l'exteriur dad Ignazio Cassis.
La reconstrucziun da l'Ucraina saja da gronda muntada strategica per la stabilitad da l'Europa, hai gì num. Sco basa per la reconstrucziun duain gidar ils principis ch'ins aveva decis l'onn 2022 tar la conferenza a Lugano. Per sustegnair l'Ucraina sajan planisads var 1,5 milliardas francs fin il 2028.
Selenski: planisaziun da conferenza duai cumenzar mardi
Il president ucranais, Wolodimir Selenski, ha engrazià a la Svizra per il sustegn – surtut era che la Svizra ha surpiglià las sancziuns da l'UE cunter la Russia. El na veglia dentant perder nagin temp: la planisaziun da la conferenza da pasch duai cumenzar gia mardi. Tar quella sajan envidads tut ils stadis che veglian sa participar a la pasch. In plan pli concret na datti entant betg.
Davart la reconstrucziun da l'Ucraina vai tenor Wolodimir Selenski surtut per reconstruir ina rait d'electricitad decentrala, sco era da rumir minas en ils champs.
In di plain inscunters
Selenksi è s'inscuntrà glindesdi suentermezdi a Berna cun la presidenta da la Confederaziun Viola Amherd e cun ils cussegliers federals Ignazio Cassis e Beat Jans. Sper persunas ord il Cussegl federal ha il president ucranais era discurrì cun parlamentarias e parlamentaris svizzers, sco era cun ils schefs da partida.
En quels discurs veglia el engraziar per il sustegn ch'i dat or da la Svizra, dentant era tematisar sancziuns cunter la Russia e pussaivladads da duvrar facultads russas bloccadas.
Per Selenski è quai l'emprima visita en Svizra dapi il cumenzament da la guerra en l'Ucraina. Mardi vul Selenski lura tegnair in pled al Forum mundial d’economia a Tavau e s’inscuntrar cun represchentants e represchentantas da plirs stadis.
