Passa 40 stadis han suttascrit la decleraziun da Lugano che definescha ils princips per la reconstrucziun da l’Ucraina. Uschia definescha il document ch'il stadi da dretg sto vegnir garantì e la corrupziun en il pajais vegnir eliminada. L’Ucraina ha enta maun co che la reconstrucziun ha da vesair ora, sto però collavurar, coordinar ed esser transparenta en tut il process da la reconstrucziun.
Era la cunvegna da clima da Paris sto vegnir resguardada, perquai che la reconstrucziun sto esser persistenta. Vinavant sto vegnir resguardada l'egualitad tranter dunnas ed umens e minoritads ston vegnir integradas. La decleraziun è in document politic che n'è però betg liant giuridicamain.
La Svizra dublescha ses agid per l'Ucraina
La Svizra dublescha ses agid per l'Ucraina fin la fin dal 2023 sin 100 milliuns francs. Quai ha il president da la Confederaziun Ignazio Cassis annunzià il mardi a la conferenza a Lugano. Cun 15 milliuns francs duai vegnir sustegnì l'economia digitala dal pajais.
La Svizra e l'Ucraina vulan collavurar tar la protecziun dal clima
La Svizra e l’Ucraina vulan lavurar ensemen per la protecziun dal clima. Quai han ellas decis a l’ur da la conferenza per la reconstrucziun da l’Ucraina. La ministra da l’ambient Sommaruga ed il minister ucranais per l’ecologia e resursas natiralas Ruslan Striletz han suttascrit ensemen ina cunvegna. Quella duaja permetter ina protecziun dal clima internaziunala e schlargiada, ha communitgà il departament da Sommaruga sin twitter.
Il pled d'avertura da Ignazio Cassis
En ses pled d’avertura ha Ignazio Cassis ditg ch'il giavisch da dar a la glieud en l’Ucraina ina perspectiva per in futur paschaivel en quest terribel plain destrucziun e cordoli uneschia las persunas preschentas a la conferenza. Il president da la Confederaziun ha dentant er concedì, che dus dis inscunter na bastian betg per garantir a l'Ucraina in futur prosperant. I gidia dentant per pudair sa far in maletg pli cler da la situaziun.
Selensky ha engrazià a la Svizra per l'organisaziun
Il president da l'Ucraina, Wolodimir Selensky, ha en ses pled d'avertura engrazià a la Svizra per l'organisaziun. Plinavant ha el fatg attent, che la reconstrucziun da l'Ucraina saja in project che pertutgia tut ils pajais democratics. En ses pled d'avertura ha el er accentuà che la reconstrucziun dal pajais stoppia ir maun en maun cun la refurma da la giustia ed il cumbat cunter la corrupziun.
«Building back better»
La finamira saja da betg mo reconstruir quai ch'era, mabain crear ina meglra infrastructura, in meglier ambient ed er in meglier stadi. Quai funcziuneschia dentant mo sche l'Ucraina cuntinueschia cun las refurmas necessarias, ha Cassis accentuà.
Mesiras da segirezza augmentadas
In eveniment extraordinari vul er dir che la segirezza vegn augmentada. Responsabla è la Polizia chantunala dal Tessin. Tenor il capo Matteo Cocchi èn els pronts, dentant sajan ins fitg cuntents per la buna collavuraziun cun las polizias dals auters chantuns. Sustegn survegnan els era da l'armada. Fin a 1'600 schuldada stattan a disposiziun per gidar a segirar l'eveniment. Il divisiunari Lucas Caduff ha ditg envers RTR ch'ins haja era pudì profitar dal dispositiv da segirezza dal WEF.
Dentant datti a Lugano era sfidas ch'èn differentas. Per exempel è il cunfin cun l'Italia pli datiers ed il spazi da l'aria vegn controllà e coordinà ensemen cun l'Italia. Plinavant sto er il Lago Maggiore vegnir tegnì en egl.
