Il Cusseglier federal Ueli Maurer ha lantschà il cumbat da votaziun enten preschentar ils arguments da Parlament e Cussegl federal. La refurma na saja betg ina gronda revoluziun, mo ina «refurmetta». Sulettamain 5% da la taglia anticipada saja pertutgada da la midada, damai che mo novas obligaziuns possian profitar. Malgrà quai saja la refurma impurtanta.
Per quai vai
Sin entradas da tschains incassescha la Confederaziun oz ina taglia anticipada da 35%. Persunas privatas pon dumandar enavos quella cun inditgar quai en il formular da taglia. Sumegliant èsi sche interpresas vulan augmentar lur liquiditad cun dar ora obligaziuns.
Gist qua saja quella taglia anticipada dentant in dischavantatg, di Maurer. Per guntgir la birocrazia e la taglia n'edeschian bleras interpresas lur obligaziuns betg en Svizra mabain en l’exteriur nua ch'i na dettia betg ina tala taglia.
Quai dubitan ils adversaris
Tenor la sanestra profiteschan mo bun 200 concerns gronds sche la taglia anticipada vegn stritgada sco previs. Ultra da quai saja da quintar cun ina bler pli gronda sperdita d'entradas da taglia che quai che l'Administraziun federala da taglia haja calculà. Lezza quinta cun fin 275 milliuns francs per onn che mancan en la cassa. Quai dentant mo sche la situaziun da l'economia resta stabila ed ils tschains bass. Ils adversaris quintan perquai cun in minus da fin 800 milliuns francs. Plinavant duai la taglia anticipada impedir l'omissiun fiscala. D'abolir quella per tschertas gruppas d'investurs promovia gist il cuntrari.
Quai privel na vesa il minister da finanzas dentant betg: Cusseglier federal Ueli Maurer è persvadì che la refurma da la taglia anticipada è sut il stritg in gudogn per la Svizra. E gist en vista da las sfidas futuras fissi impurtant da dar a la plazza da finanzas svizra in signal positiv.
Svizras e Svizzers voteschan ils 25 da settember davart questa fatschenta.
