- In donn finanzial da plirs tozzels milliuns francs e pussaivlas cugliunarias en 26 cas. Quai è il resultat d'in rapport da la Controlla federala da finanzas, EFK, davart la cumpra da panzers Leopard 1 entras la Ruag.
- Il donn finanzial per la Confederaziun pudess esser en l'autezza da plirs tozzels milliuns francs.
- Il Departament federal da defensiun, VBS, sco possessur da la Ruag haja ademplì sia funcziun da surveglianza a moda manglusa, crititgescha sper la EFK er la cumissiun da gestiun dal Cussegl dals chantuns.
Tar la Ruag duai esser vegnì cugliunà. En il focus stat in anteriur collavuratur da cader da la Ruag. Ch'igl è vegnì uschè lunsch, ha era da far cun mancanzas da la direcziun da la Ruag e dal departament da defensiun sut la cussegliera federala Viola Amherd.
Gia avant in onn ha la controlla da finanzas rapportà ch'i na giria forsa betg dal tut schuber tar il concern Ruag, ch'i haja dà irregularitads tar la cumpra ed il commerzi da panzers e da parts singulas. Ma ussa sa mussa l'emprima giada la dimensiun da l'istorgia: la Ruag e la Confederaziun pudessan avair in donn finanzial da plirs tozzels milliuns francs. En quest connex sa tracti d'ina stimaziun da la EFK.
Simpel model da cugliunaria
Probablamain èn las cugliunarias idas uschia: Il collavuratur da cader inculpà ha cumprà material ed ha vendì quel vinavant sut la valur, tranter auter ad ina firma, nua che sia dunna sesa en la direcziun. Quella ha alura pudì cuntanscher potenzialmain gronds gudogns sin il martgà liber. Percunter ha la Ruag gì in donn finanzial da milliuns.
Plinavant numna la EFK transacziuns betg chapiblas a disfavur da la Ruag u quints probablamain falsifitgads. «I dat 26 cas potenzials d’engion», di Pascal Stirnimann, il manader da la Controlla federala da finanzas. Cunter l’anteriur um da cader da la Ruag investigheschan las autoritads tudestgas dapi intgin temp.
La Controlla da finanzas discurra d'indizis clers davart il fraud ed uschia dad «indizis substanzials d'in cumportament penal presumtiv en plirs cas». Ma era la Ruag na saja betg sa cumportada correctamain. Uschia na saja in'annunzia davart ils cas da cugliunaria supponida betg vegnida transmessa ed elavurada correctamain. I haja dà indizis concrets che tocs da reserva e material vegnian vendids cleramain sut ils pretschs da martgà e che tras quai succedia in enritgiment persunal. La Ruag n'haja betg examinà independentamain l'annunzia e tralaschà d'instradar ils pass necessaris.
Il possessur da la Ruag è il Departament federal da defensiun, VBS. Quel avess stuì diriger la basa strategica meglier ed accumpagnar pli criticamain la Ruag, di la EFK. Sche la cussegliera federala Viola Amherd haja fatg sbagls en quest connex na saja betg vi dad els da giuditgar, di Pascal Stirnimann. La EFK ha terminà las inquisiziuns, ses rapports èn avant maun. Ils fatgs stoppian vegnir elavurads e surdads a las autoritads da persecuziun penala.
L’entira affera va enavos sin ina fatschenta d’armament da l’onn 2016: Da lez temp ha la Ruag cumprà 100 tocs da panzers Leopard 1 en l’Italia e tocca da reserva vitiers. Gia alura cun l’idea da puspè vender ils chars armads u parts da chars armads. La Controlla federala da finanzas ha examinà questa fatschenta cun ils vegls panzers Leopard 1 ed ha constatà gia là grondas mancanzas.
Or da l'archiv: