Ir en vacanzas en l'exteriur – in patratg carmalond damai ch'igl è vegnì pli fraid e las vacanzas d'atun entschaivan. Sch'ins sa decida alura da far quai, ston ins resguardar las reglas da corona. Ils pajais dal sid ch'èn il mument ils pli tschertgads èn l'Egipta, la Spagna, l'talia e la Tirchia - ed en quels pajais vegn il certificat da covid svizzer acceptà. Quel duessan ins per far la segira era anc avair sin palpiri. L'accu dal natel è numnadamain anc spert vid.
Persunas che n'èn betg vaccinadas u guaridas ston far in test da PCR (vala per 72 uras) u in d'antigen (vala 48 uras) per survegnir il certificat e pudair viagiar. L'organisatur da viadi Kuoni recumonda per exempel da guardar ch'il test saja valaivels fin ch'ins haja fatg il check-in en l'hotel.
Ustarias ed occurrenzas endadens
En l'Egipta ed en la Tirchia ston ins purtar ina mascrina sch'ins vul ir a tschaina u ad in'occurrenza ch'è endadens.
En l'Italia ed en la Grezia èsi da principi tuttina sco en Svizra. Là ston ins avair in certificat. Persunas ch'èn betg viroladas u guaridas ston far in test sch'ellas vulan ir a magliar ina pizza u bever in glas vin grec.
Pajais vischinants
Era per la Germania e l'Austria vala la regla da 3G. Persunas davent da 12 onns ston esser vaccinadas, guaridas u testadas. Plinavant n'èsi betg d'emblidar da prender cun in'autra mascrina che quai che nus purtain en Svizra. Numnadamain ina da FFP2 – quella dovran ins en intgins lieus u regiuns. En las discotecas a Vienna valan reglas pli strentgas: Là dastgan sulettamain persunas vaccinadas u guaridas entrar (regla da 2G).
Return
En general sto mintgin e mintgina che returna en Svizra emplenir ora in formular d'entrada. Quai vala tranter auter era per la Germania, la Frantscha u l'Italia. Sch'ins e dentant stà en vacanzas datiers dals cunfins svizzers – per exempel en la Baviera u en il Piemont – dovran ins nagin formular. Era per returnar en Svizra valan las reglas da 3G. Persunas che han fatg in test ston repeter quel entaifer da 4-7 dis en Svizra.
I dovra preparaziun
Senza preparaziun na va nagut per far vacanzas en l'exteriur il mument. Nus avain rimnà in per tips e dain a tai ina survista.
