Ils tschains da locaziun pudessan s’augmentar per 15% fin il 2026. Quai ha ditg il directur da l’Uffizi federal d’abitaziuns, Martin Tschirren, en in’intervista cun la gasetta «Blick». Cun augmentar il tschains da referenza per locaziun per 0,25 puncts procentuals, dastgian ils locaturs e las locaturas numnadamain augmentar ils tschains da locaziun per 3%.
Er la chareschia fa crescher ils tschains
In'ulteriura raschun per l'augment dals tschains da locaziun vesa Tschirren en la chareschia. 40% da quella dastgan ils proprietaris e las proprietarias metter a quint. Er il augment general dals custs vegnia ad augmentar ils tschains, di Tschirren. El quintia cun l'augment dal tschain da referenza il december u il mars.
Il tschain da referenza è il venderdi vegnì annunzià da l'Uffizi federal d'abitaziuns. Quel è restà sin 1,5% e na lubesch pia betg in augment dals tschains da locaziun. Ch'il tschain n'è betg sa midà, è dentant stà ina decisiun piz a cup, ed i vegn prognostitgà ch'il augment suonda tar il proxim termin da midada. Calculà vegn il tschain da referenza sin basa dals tschains ipotecars, el vegn dentant fatg radund sin 0,25%.
