Cassis ha, ensemen cun la regenza tessinaisa, preschentà a Bellinzona intgins puncts centrals da la conferenza. Uschia duai dar ina «Decleraziun da Lugano», cun ils pli impurtants resultats da l'inscunter che cuzza dus dis. Tenor Cassis na fissi betg realistic da vulair reglar gia en detagl la reconstrucziun dal pajais, ins possia dentant definir prioritads, metodas e princips.
Desister da la conferenza perquai che la guerra n'è anc betg a fin, fiss in terribel signal envers ils Ucranais e las Ucranaisas – sco sch'ins na cartess betg pli vid l'existenza da l'Ucraina. Avert restia vinavant sch'il president ucranais Wolodimir Selenski vegn a Lugano ils 4 e 5 da fanadur. Er tgi che vegnia dals stadis dal vest n'è anc betg cler. Per Ignazio Cassis na portian talas speculaziuns dentant nagut, duas emnas avant l'inscunter.
Sco adina tar tals inscunters, ston ins restar flexibel fin a paucas uras avant l'inscunter, per pudair resguardar annunzias il davos mument.
La Confederaziun surpiglia 80% dals custs da la conferenza. En pli vegnian ad esser en funcziun 1'600 schuldada svizra.
