Travailsuisse maina da nov ina glista naira per cumbatter la discriminaziun da pajas. Lavurantas e lavurants duain annunziar a moda anonima interpresas che negligeschan da far l'analisa da l'egualitad da las pajas, pretendida da la lescha. Interpresas cun passa 100 emploiads èn obligads dapi il fanadur 2020 d'analisar l'egualitad da las pajas. Tenor Travailsuisse mancan dentant controllas da las analisas, sco era sancziuns.
L'uniun tetgala dals sindicats pretenda perquai ch'interpresas cun ina inegualitad da las pajas inexplitgabla ston repeter l'analisa e las interpresas che na fan nagut encunter l'ingiustia stoppian vegnir sancziunadas. Sin la plattafurma da Travailsuisse datti era ina glista alva, cun las radund 160 interpresas che sa tegnian vi da la lescha da l'egualitad da las schlattainas. En tut sajan radund 450'000 emploiads ed emploiadas cumpigliadas, quai è tenor Travailsuisse 18% da tuts lavurers en Svizra. I na saja dentant betg ina prova statistica mabain las interpresas che veglian activamain far insatge cunter l'ingiustia.
Ils resultats questa glista alva mussan, che radund 95% da tut las interpresas han ina inegualitad da las pajas inexplitgabla tranter um e dunna. La pli gronda differenza saja tar 15,7% en disfavur da las dunnas. En la media tar 3%. I saja era sa mussà che las interpresas prendian mesiras sch'ellas èn engaschadas cun in partenari sozial.
