Che mastergns da dunnas vegnian stimads memia pauc saja il motiv per la differenza da paja tranter um e dunna. A questa conclusiun vegn in'analisa da l'Uniun sindicala svizra SGB. I na saja betg mo perquai che dunnas lavurian pli savens parzialmain ch'ellas vegnian dischavantagiadas.
Tenor SGB sajan las pajas l'ura en mastergns, nua che cunzunt dunnas lavurian en congual bler pli bassas. Per exempel: en il commerzi en detagl, la tgira e la restauraziun. Malgrà in emprendissadi gudognan 4 da 10 dunnas main che 5’000 francs il mais. Latiers na survegnan dunnas pli savens betg la 13avla paja e la progressiun da paja saja mendra.
L'SGB pretenda mesiras sco analisas da paja obligatoricas per firmas e pajas minimalas da 5’000 francs per persunas ch'han fatg in emprendissadi. En pli duaja la tgira d'uffants vegnir organisada sco service public per pussibilitar che la lavur pajada e nunpajada vegnia repartida gist tranter um e dunna.
