En il cumbat cunter la pandemia mobilisescha l’armada svizra 120 ulteriuras schuldadas e schuldads. Ils commembers dal battagliun d’ospital 2 duain sustegnair il sectur da la sanadad suenter Nadal. Quai ha communitgà l’armada svizra.
L'armada sustegn dapi l'entschatta dal mais
Gia dapi l'entschatta december sustegnan commembras e commembers da l'armada las instituziuns da sanadad dals chantuns – oravant tut en il servetsch da sanitad. Quai per dumagnar la pandemia e dar la vaccinaziun da rinfrestgament (booster). Da preschent s'engaschan radund 90 militars en servetsch lung sco er voluntarias e voluntaris en ils chantuns Giura, Vallais, Neuchâtel e Friburg.
Dapli lavur che previs
Ussa sa mussia ch’i vegn a dar dapli lavur per l’armada che previs. Perquai mobilisescha l'armada ina part dal battagliun d’ospital 2 sco furmaziun da milissa cun prontadad auta per il servetsch d'assistenza. Quai davent dals 26 ed ils 27 da december.
La terza mobilisaziun
Ils 7 da december ha il Cussegl federal decidì danovamain in servetsch d'assistenza da l'armada svizra. Maximal 2'500 commembras e commembers da l'armada pon vegnir mobilisads. In'intervenziun da quella poi dar cura ch'ils chantuns dumondan per agid tar la Confederaziun.