La calculaziun da la taxa da medias per interpresas è cuntraria a la constituziun. Quai ha decis il Tribunal administrativ federal. Interpresas pajan la taxa da medias tenor svieuta. Pli gronda la svieuta e pli pauc che l’interpresa paja procentualmain.
Quatter interpresas avevan reclamà encunter la pratica actuala tar l'Administraziun federala da taglia. Quella è responsabla per la taxa da radio e televisiun tar interpresas. Ellas n'avevan dentant betg gì success. Il Tribunal administrativ federal ha dentant decis che questa tariffa degressiva è cuntraria a la constituziun. La taxa da medias saja sco ina taglia e stoppia perquai er s’orientar a la prestaziun economica, pia esser lineara u progressiva. Il tribunal cusseglia al Cussegl federal da far lineara u progressiva la taxa.
Per il mument resta dentant la taxa actuala applitgabla, enfin ch’il Cussegl federal fixescha la taxa da nov l’auter onn. Uschiglio na saja la finanziaziun da radio e televisiun betg garantida. La sentenzia n’è anc betg legalmain valaivla, l'Administraziun federala da taglia examinescha la pussaivladad da trair vinavant il cas al Tribunal federal.
