La bova ch'è ida a val tar la Fora da S. Martin en l'arena tectonica Sardona al cunfin tranter ils chantuns Glaruna e Grischun è massivamain pli gronda che pensà oriundamain, ed ella ha era tutgà territori grischun. Quai ha mussà in sgol d'exploraziun cun in helicopter glindesdi da quest'emna. Experts han oriundamain sminà che 10 milli meters cubics crappa sajan ids a val. Il sgol haja però mussà ch'i saja bler dapli, ha ditg il geolog da l'arena tectonica Sardona Thomas Buckingham envers SRF. Tenor las pli novas infurmaziuns sajan probablamain 100'000 meters cubics crappa ids a val. Nov saja ultra da quai era che radund 30% da la crappa saja crudada sin territori grischun.
Anc adina privel
I sa tractia d'ina da las pli grondas bovas dals onns passads, agiunta Buckingham. Ins stoppia era vinavant quintar che crappa crodia. La populaziun vegn supplitgada d'evitar la regiun. La situaziun vegnia vinavant observada, ed els emprovian da far ulteriurs maletgs. Forsa ch'i dettia en il futur infurmaziuns pli cleras pertge che la bova saja ida a val. La crappa resta entant nua ch'ella è. Ella na vegn betg manada davent. Tenor Buckingham n'è la Fora da S. Martin betg periclitada, cunquai che la crappa sur la fora saja differenta.
Quai era capità:
- A travers sur la renumada Fora da S. Martin sur Elm en Glaruna è ida a val ina gronda bova.
- Nagin na para dad avair remartgà la bova da crappa a la cresta dal piz dal Grond Tschingelhorn, scriva l'uniun Patrimoni mundial Sardona.
- Tenor il Servetsch svizzer da terratrembels è la crudada capitada ils 3 d'october a las 9:46. Umans e l'infrastructura n'èn per fortuna betg stads pertutgads.
- Ins stoppia quintar cun ulteriuras crudadas il proxim temp e cunzunt la primavaira proxima.
Cunzunt las abitantas ed ils abitants da la vischnanca d'Elm hajan constatà che la muntogna vesia tuttenina ora in zic auter, aveva declerà il geolog Thomas Buckingham a l'agentura da novitad Keystone-SDA. Il servetsch da terratrembel haja mesirà a las 9:46 dals 3 d'october ina scurlada da 2,2 sin la scala da Richter.
Ina raschun considerabla per la crudada dal grip al Grond Tschingelhorn è la cumposiziun dal grip. Ils pizs gits da Las siat soras consistan or da crap da Verrucano. Gist questa crappa da Verrucano directamain sur la ruttadira inversa glarunaisa è enconuschenta per lur instabilitad. Plinavant suppona Thomas Buckingham che las grondas midadas da temperatura e la stad cun blera plievgia pudessan esser ulteriuras raschuns per la curdada dal grip.
La ruttadira inversa glarunaisa è la midada tar la rasada grischa da chaltschina che giascha sut en. La Fora da S. Martin perfora questa rasada da chaltschina sin mes’autezza.
Pussaivladad per ulteriuras crudadas
Pervia da la crudada da grip na saja la Fora da S. Martin betg pli cuntanschibla per alpinistas ed alpinists, ha Buckingham ditg vinavant. Ultra da quai vegnia scusseglià urgentamain da turas da raiver e da spassegiadas en ils conturns directs: Ils responsabels quintan cun ulteriuras crudadas.
Il sectur inclinà sur la Fora da S. Martin al Grond Tschingelhorn è enconuschent per sia gronda activitad da crudadas da crappa. Terratrembels en la regiun pudessan gidar a schluccar la crappa. Durant ils ultims dis n'ha il servetsch svizzer da terratrembels dentant registrà naginas stremblidas en ils conturns directs.
