Il Cussegl naziunal debattescha la revisiun dal dretg per societads anonimas. Ina part da la revisiun prevesa quotas per dunnas en cussegls d'administraziun ed en la direcziun da firmas svizras dotadas a la bursa.
La tema da las quotas
La dumonda sparta era las opiniuns da las commembras dal «Career Women’s Forum». Quest'emna ha il forum gì ina dieta che ha tractà precis quel tema. La presidenta dal forum di che diversas dunnas hajan resalvas pertutgant la quota. I dettia la tema ch’ins survegnia in bul sco «dunna da quotas» e ch'ins na vegnia betg propi prendida seriusa.
Tut las dunnas èn però d’accord: Ins vul dapli dunnas en cussegls d’administraziun ed en direcziuns, uschia ch'ins na sa sentia betg uschè solitaria en quels gremis.
Donn ch'i dovra leschas
Insumma, i saja donn ch'i dovria ina lescha per pudair promover las dunnas en las etaschas da scheffAs. Ma mintgatant saja quai necessari di, Annabella Cardone.
Mintgatant dovri leschas per midar la mentalitad e per betg spetgar che la mentalitad sa midia.
Ella pprenda l’exempel dal dretg da vuschar per las dunnas en il chantun Appenzell dadens. Il 1990 è quel vegnì introducì, suenter ch'il Tribunal federal aveva decis en chaussa. Era sche la mastralia d’umens da l’Appenzell dadens na vuleva betg dar a lur dunnas il dretg da vuschar.
I dovra dapli che quotas
Quotas sajan mo in dals instruments che fetschian da basegn, di la presidenta dal «Career Women’s Forum». Ils gronds midaments stoppian vegnir da las firmas. Lavur a temp parzial e temps da lavur flexibels èn be 2 da bleras mesiras che firmas duain prender per sustegnair e promover las dunnas.
La gravidanza è anc adina il motiv principal per la discriminaziun da las dunnas.
Per pudair cuntanscher ils midaments stoppian las dunnas prender l’iniziativa. Dentant era ils umens stoppian sa prender per il nas. I vul omadus per cuntanscher las finamiras a lunga vista.
Abolir quotas? Gea, però pir cura ch'i funcziuna senza
E sch'igl avess da dar quotas, di Annabella Cardone, lura duain quellas esser in instrument che gida a render «normal» che dunnas èn represchentadas en cussegls d’administraziun ed en direcziuns da firmas svizras dotadas a la bursa. Cura che quai na saja betg pli l’excepziun, possian las quotas patgific vegnir abolidas, di Cardone.
Uschia è la resposta dad Annabella Cardone sin la dumonda, sch'i dovra quotas u betg: «Bel fissi, sch'i funcziunass senza. Ma displaschaivlamain fa quai da basegn».
RR actualitad 11:00
