Il Cussegl naziunal tracta questa mesemna l'iniziativa da la PPS «Dretg svizzer enstagl da derschaders esters». Cun l’iniziativa vul la partida populara evitar ch'il dretg internaziunal ha en tschertas dumondas dapli paisa ch'il dretg svizzer ni decisiuns a l'urna. Votums emoziunals e cuntravers èn garantids.
E betg main emoziunal vai lura gist vinavant. Quai cun la debatta davart la lescha d'armas. La dumonda è sche la Svizra duai surprender per ina buna part las leschas pli severas che valan da nov per tut ils pajais commembers da la cunvegna da Schengen.
Purs cunter dapli commerzi liber
La segunda emna cumenza en la chombra gronda cun ina discussiun davart in rapport dal Cussegl federal. En quel skizzescha lez il futur da sia politica agrara. L'Uniun purila svizra ha il cuntegn da quai rapport dentant grittentà uschè fitg ch'ella pretenda da renviar il rapport al Cussegl federal. Fatg siglir la chicra ha als purs cunzunt ina passascha nua ch'il Cussegl federal declera ch'el vul a media vista, avrir la fiera agrara svizra, quai cun ulteriuras convenziuns da commerzi liber.
Ed in ulteriur project pli grond tracta la chombra gronda a la fin da la sessiun, la refurma dal dretg d'aczias. In tema brisant - la promoziun da dunnas en la direcziun ed en il cussegl d'administraziun d'interpresas grondas.
Interpresas duai controllar egualitad da paja
Cun dumondas d'egualitad s'occupa questa sessiun era il Cussegl dals chantuns. Cun la revisiun da la lescha federala d'egualitad duain las interpresas cun dapli che 100 emploiadas ed emploiads vegnir obligadas da controllar regularmain sche las dunnas gudognan per la medema lavur medem bler sco il umens.
Per egualitad en in'autra furma vai era tar il project da taglia 17. Il project precedent, la lescha davart la refurma da l'imposiziun da taglia sin interpresas 3 (USR3) ha gì fatg naufragi il favrer avant in onn. Ina raschun era che la maioritad da las votantas e dals votants ha gì il sentiment ch'i mancava l'equiliber tranter las reducziuns da taglia per las interpresas e la cumpensaziun da quellas sperditas. La cumissiun dal Cussegl dals chantuns presenta ussa ina proposta che cuntegn ina simmetria. Per mintga franc reducziun da taglia per las interpresas duai dar in franc supplementar ella cassa da l'AVS. I vegn ad esser interessant d'observar sche quella cumbinaziun nunusitada chatta ina maioritad en la chombra pitschna.
Schluccar protecziun dal luf
E per finir anc il luf. Lez è tema en la revisiun da la lescha da chatscha ch’il Cussegl dals chantuns tracta en la segunda emna. La cumissiun propona da schluccar la protecziun dal luf uschia ch'i duai esser pussaivel da regular il dumber da lufs en ina regiun. Quai sch'els fan donns ni pericliteschan carstgauns.
RR actualitad 12:00