L'uschenumnà sboz da taglia 17 vegn però giuditgà sco pli equilibrà ed er la prontezza da cumpromiss para d'esser pli auta. Quai resorta da la consultaziun ch'è a fin. Igl è però er sa mussà ch'i vegn probabel puspè a dar lungas discussiuns fin tar ina schliaziun da cumpromiss.
Bain sustegnan ils chantuns l'idea dal Cussegl federal d'impunder ina taglia sin dividendas da participaziuns pli grondas che 10% e d'auzar ils supplements per uffants per 30 francs.
Da l'autra vart na vulan ils directurs da finanzas chantunals ensemen cun l'uniun da las vischnancas betg acceptar che la cumpart dals chantuns vi da la taglia federala directa vegnia d'auzada be sin 20,5% empè da sin 21,2% sco previs en la refurma da la taglia sin interpresas III.
Il settember ha il Cussegl federal preschentà il nov sboz per refurmar la taglia sin interpresas. Quel custa la Confederaziun anc radund 750 milliuns francs envers las 1,2 milliardas francs che la refurma da la taglia sin interpresas III avess custà.
Regenza grischuna betg dal tut d'accord
La regenza grischuna n'è betg dal tut d'accord cun la revisiun dal dretg federal davart l'imposiziun da taglia sin interpresas. Da principi sustegn ella las explicaziuns da la conferenza dals directurs da finanzas chantunals concernent il project fiscal 17.
Spezialmain refusa la regenza grischuna che la taglia federala directa duai esser pli bassa cumpareglià cun la refurma da l'imposiziun da taglia sin interpresas III. Il Grischun saja il chantun che vegnia a subir fitg grondas perditas en la gulivaziun da finanzas da la Confederaziun. Perquai stoppian ins fixar la cumpart da la taglia federala directa sin almain 21,2%.
RR novitads 14:00++