Alexandre Fasel è il nov secretari da stadi dal Departament federal d'affars exteriurs (EDA). Il Cussegl Federal ha nominà el la mesemna. Cun quai vegn el a succeder a Livia Leu, che ha demissiunà l'entschatta da matg.
Il secretari da stadi cusseglia il Cussegl federal en tut las dumondas da la politica da l'exteriur. Sco ch'il Cussegl federal scriva, haja Fasel las qualitads e l'experientscha necessaria per quest post grazia a sia lunga carriera sco schef da missiun sin nivel multilateral e bilateral ed er sias bleras differentas posiziuns a Berna.
Il diplomat da 62 onns è fin ussa stà represchentant spezial per la diplomazia da la scienza a Genevra, avant è el stà tranter auter ambassadur a Londra e secretari da stadi suppleant.
El vegn a surpigliar ses nov post l'emprim da settember.
