La Fracziun da la Chasa federala da la PS è sa decidida suenter l'audiziun da las trais candidatas per Eva Herzog ed Elisabeth Baume-Schneider, omaduas cusseglieras dals chantuns. Evi Allemann, cussegliera guvernativa da Berna, na po betg sin il ticket da la Partida socialdemocratica. L'Assamblea federala decida ils 7 da december tgi che suonda sin la cussegliera federala partenta Simonetta Sommaruga (PS).
Tenor SRF ha Eva Herzog la rolla da la favurita. Betg mo ch'ella è ina represchentanta d'in chantun-citad. Ella appartegna er tar l'ala liberala da la partida e saja pli populara tar la maioritad burgaisa en il parlament che Baume-Schneider ch'appartegna plitost tar l'ala sanestra da la partida.
Eva Herzog, la candidata da l'ala liberala
La dunna da 60 onns è stada 15 onns en la regenza da Basilea ed ha purtà grond surpli. Dapi il december 2019 è ella en il Cussegl dals chantuns. Ella s'engascha cunzunt en la cumissiun da finanzas, la cumissiun per scienza, furmaziun e cultura e la cumissiun d'economia.
La Partida socialdemocratica dal chantun Basilea-Citad ha uffizialmain nominà Eva Herzog sco candidata per la successiun da Simonetta Sommaruga en il Cussegl federal. Quai han las delegadas e delegads decis tar ina radunanza extraordinaria ils 17 da november.
Elisabeth Baume-Schneider
La vicepresidenta da la PS politisescha dapi il 2019 per il chantun Giura en il Cussegl dals chantuns. Ella è tranter auter en la cumissiun da gestiun e presidiescha la cumissiun per ambient, planisaziun dal territori ed energia. Sco ella ha ditg envers las medias candidescha ella cun persvasiun.
Daniel Jositsch retira candidatura
In curt mument da confusiun hai dà suenter la surprendenta demissiun da Sommaruga. Era sche il co-presidi da la partida Wermuth-Meyer ha exlcudì candidaturas dad umens per avair puspè ina dunna en il cussegl federal, ha Daniel Jositsch annunzià ils 8 da november sia candidatura. Cunquai ha el fatg frunt a la direcziun da la partida. El ha era tschantschà da discriminaziun cunter umens.
Suenter la decisiun da la fracziun dal ticket da duas dunnas, ha el retratg sia candidatura. Il cusseglier dals chantuns turitgais ha ditg envers las medias ch'el enclegia la decisiun da la fracziun e che las trais candidatas sajan excellentas.