La PS, la partida da Simonetta Sommaruga, deplorescha la demissiun. I saja dentant da respectar questa decisiun ed er la sfera privata da la cussegliera federala, communitgescha la Partida socialdemocratica .
La fracziun dal Parlament federal nominescha la successiun ils 26 da november. Ed i duai esser ina dunna, perquai vegn la PS a proponer in ticket da duas dunnas per l'elecziun dals 7 da december. Il medem di vegn er elegì in successur per Ueli Maurer (PPS).
Er per ils cussegliers naziunals grischuns da la PS - Sandra Locher Benguerel e Jon Pult - è la demissiun ina surpraisa totala, sco els han ditg envers RTR. Simonetta Sommaruga saja in idol per bleras dunnas e politicras, accentuescha Sandra Locher Benguerel. D'in maun deploreschia ella la demissiun - da l'autra vart saja da respectar e d'admirar che la cussegliera federala fetschia in tal pass per motivs persunals. Jon Pult ha collavurà surtut en la cumissiun da traffic cun Simonetta Sommaruga ed è da l'avis che la cussegliera federala laschia enavos gronds fastizs per il traffic public. In tac en sia carriera saja forsa ch'ella haja pers la votaziun per introducir la lescha da CO2.
Il president dals Verds Balthasar Glättli ha engrazià a la cussegliera federala per ses «lung e curaschus engaschi». Per Simonetta Sommaruga na saja la politica nagin gieu, mabain in engaschi serius e persistent, uschia Glättli via Twitter. Er ha la Partida verda communitgà da betg candidar per il sez da Simonetta Sommaruga che vegn liber en il Cussegl federal. I dovria bain dapli forzas ecologicas en il Cussegl federal però betg sin donn e cust dal sez dals socialdemocrats, hai num en ina communicaziun.
La Partida liberaldemocratica spetga da la successura ubain dal successur da Simonetta Sommaruga da prender a mauns spert las incumbensas – surtut da segirar il provediment d'energia. I dettia anc bler da far ed immensas sfidas en differents dossiers, sco per exempel tar l'infrastructura ubain la tecnologia da 5G. La PLD engrazia dentant er a la cussegliera federala e sa drizza er cun buns giavischs a ses um.
Ella haja tut respect che Simonetta Sommaruga mettia uss sias prioritads sin la vita privata, di la cussegliera naziunala grischuna Anna Giacometti en l'intervista cun RTR. Er sche la cussegliera federala haja fatg in'autra politica ch'ella sezza, dat Giacometti bunas notas a Simonetta Sommaruga. Surtut sia suveranitad en il parlament haja adina fatg impressiun. Per il cusseglier dals chantuns Martin Schmid ha la ministra d'energia fatg buna lavur ils ultims 9 mais en la gruppa da lavur per garantir il provediment d'energia. Sommaruga haja remartgà la primavaira ch'ins stoppia agir ed ella haja mess las dretgas prioritads, per exempel er cun maisas radundas davart la forza idraulica. Donn dentant ch'ella n'haja betg gì il curaschi dad era ir cun talas fatschentas en il parlament.
L' Allianza dal Center pretenda ch'ina successura ubain in successur acceptia il princip da colleghialitad en il Cussegl federal. Via Twitter ha la partida onurà la lavur da Simonetta Sommaruga.
D'ina surpraisa discurra er il cusseglier naziunal grischun Martin Candinas – er sch'il motivs sajan chapaivels. En il sectur dal traffic public saja Simonetta Sommaruga s'engaschada fitg, persuenter avess Candinas giavischà in zic dapli chapientscha en connex cun temas per la populaziun muntagnarda, per exempel cun reveder la lescha da chatscha per regular il luf ubain tar il tema d'abitaziuns secundaras. Il cusseglier dals chantuns Stefan Engler ha adina gì l'impressiun che la cussegliera federala era fitg bain preparada sin debattas en las discussiuns. Plinavant haja Sommaruga chattà ina via pragmatica per tegnair la ballantscha tranter ideologias da sia partida e chattar maioritads sur partidas.
Per la cussegliera naziunala da la PPS Magdalena Martullo-Blocher è la demissiun perencunter be per part ina surpraisa, cunquai ch'ella saja gia 12 onns en uffizi. Sia politica da la sanestra haja destruì la segirtad dal provediment d'energia en Svizra, scriva Martullo-Blocher sin dumonda dad RTR.
Tut las persunas e partidas sa drizzan er cun buns giavischs a l'um da la cussegliera federala Lukas Hartmann che ha gì avant 10 dis in culp.
