La Partida verda da la Svizra na vul betg attatgar il sez vacant da la Partida populara Svizra en il Cussegl federal. Quai ha la fracziun annunzià mardi suenter ina sesida extraordinaria. Tenor Aline Trede, la scheffa da la fracziun, hajan tschellas partidas furmà in cartel per segirar lur pussanza en il Cussegl federal e mussian perquai nagin interess da sustegnair ina candidatura verda.
Els n'hajan nagin temp per tals gieus e vegnian perquai a sa concentrar sin las elecziuns federalas da l'onn proxim. Ils Verds speran da pudair rumper il cartel a chaschun da l'elecziun da renovaziun generala dal Cussegl federal il december 2023.
Avant parevi anc pli offensiv
Sco ina retschertga represchentativa da l’institut da perscrutaziun Sotomo per incumbensa dal SonntagsBlick mussa, èn 70% da la basa dals Verds per attatgar il sez vacant da la Partida populara svizra, 30% èn encunter.
Auter vesi dentant ora sur l’entira populaziun: Be 32% da las persunas dumandadas èn da l’avis ch’ils Verds duajan attatgar il sez vacant ed uschia er ignorar la furmla magica ch’è dapi il 1959 la basa da la cumposiziun dal Cussegl federal.
Tar la populaziun chatta Albert Rösti bun’accoglientscha. Radund la mesadad da la basa da la PPS è da l'avis che l'anteriur schef da partida duess daventar nov cusseglier federal. Ma Rösti giauda era simpatia tar la PLD, l'Allianza dal center ed tar ils Verd-liberals.
Fin venderdi proxim pon las partidas chantunalas annunziar lur candidatas. Silsuenter datti ina selecziun entaifer las partidas. L’Assamblea federala plenara elegia ils 7 da december il successur u la successura dad Ueli Maurer.
