Ueli Maurer ha ditg ch'el resentia ina tscherta satisfacziun ed haja cuntanschì inqual success durant ses temp en il Cussegl federal. Sco minister da defensiun haja el introducì la mobilisaziun e pretendì dapli daners per l'armada. Plinavant haja ses departament mess en pe la Rait naziunala da segirezza, e quai malgrà ferm cuntravent, ed el haja fusiunà il servetsch secret da l'interiur cun il servetsch secret da l'exteriur e saja losch d'avair stgaffì schuldada da sport.
En ses temp sco minister da finanzas saja tranter auter gartegià d'ir tras la crisa da corona, ins haja pudì far lavur da reorganisaziun.
Sia carriera politica
- 1978-1986 Cusseglier communal da Hinwil
- 1983-1991 Commember dal Cussegl chantunal da Turitg
- 1991-2008 Cusseglier naziunal
- 1996-2008 President da la Partida populara svizra
- 2009-2022 Cusseglier federal. Enfin il 2015 è Maurer stà schef dal Departament federal da defensiun, protecziun da la populaziun e sport. Dapi il 2016 dal Departament federal da finanzas.
- 2013/2019 President da la Confederaziun svizra
In egl che crida ed in rient
Gia dapi la stad da l'onn passà haja el resentì il desideri da far insatge auter, avant inqual mais saja quel sentiment lura sa confermà. Dapi passa 40 onns fetschia el politica ed uss saja quai avunda. L'um da 71 onns di ch'el guardia enavos cun in egl che crida ed in rient. El haja ademplì sias incumbensas cun grond entusiassem.
Or da l'archiv