En Svizra vivan radund 60% da la populaziun a tschains. L'Associaziun da locataris ha fatg in studi cun 18'000 participants e participantas per sentir il puls. Trais quarts dals dumandads han inditgà, ch'i saja la davosa giada stà grev da chattar ina abitaziun pajabla e cun la dretga grondezza. Cunzunt per famiglias ed en citads saja grev da chattar insatge adattà.
La sfida da chattar in'abitaziun sa vesia dentant er en vitgs da muntogna. In exempel perquai è l'Engiadina, nua ch'indigens han adina dapli fadia da chattar in'abitaziun. Tenor il studi han tschertas persunas perfin survegnì desditg l'abitaziun, perquai che bleras èn d'affittar sco chasas da vacanzas u segundas abitaziuns. Vitiers vegn, ch'i na dat betg avunda spazi da viver per crear novs bajetgs.
Era la relaziun da locaziun è ina sfida
70% dals locataris e las locatarias han inditgà, ch'els hajan gì problems cun lur locaturs u locaturas. Quai per exempel tar ils custs, tar donns en las abitaziun u en connex cun sanaziuns. Blers inditgeschan ch'ils problems na sajan mai sa schliads. Ils blers valiteschan lur relaziun cun ils locaturs e las locaturas sco fitg impurtanta.
Ma perquai ch'igl è uschè grev da chattar ina nova abitaziun adattada datti ina tscherta dependenza tranter il locatur ed il locatari. Blers e bleras teman ina visada da l'abitaziun pervia da dispitas. Perquai emprovan els ed ellas da salvar la pasch. Quai sa mussa per exempel uschia: Quatter da diesch locatarias e locataris n'han betg pretendì ina reducziun dal tschains suenter ch'il tschains da referenza è vegnì sbassà, ord tema che quai pudessia midar la relaziun cun il locatur.
Ord ils resultats dal studi ha l'associaziun tratg la conclusiun ch'i dess mesiras che pudessan schliar quests problems. I fiss per exempel d'avantatg sch'ils locataris e las locatarias na stuessan betg vegnir sez activs cura il tschains da referenza sa mida. Plinavant giavischian ils blers e las bleras dals dumandads e las dumandadas ch'i dess dapli spazi d'abitar ed ina meglra protecziun da la desditga d'ina abitaziun.
Ord l'archiv
Er a Valsot èsi adina pli difficil per indigens da chattar abitaziuns. Ina schliaziun pussibla ha la vischnanca da Valsot.
