Durant l’entira mesemna èn lavurers stads vid rumir las restanzas da la planta. E blers indigens da Cuira èn vegnids sperasvi per dir adia e per prender cun ina regurdientscha dal fau purpur. Daltut a svanir na vegn la planta dentant betg. Il bist giusut da la planta da bun dus meters vegn a restar. E dasper è gia vegnì plantà in nov fau purpur, cunquai ch’i era enconuschent che la planta da bun 100 onns era en in schlet stadi.
-
Bild 1 von 2Legenda: RTR -
Bild 2 von 2Legenda: En il curtin da la regenza a Cuira ha l'urizi derschì il fau purpur da radund 100 onns. FMR
Urizis en l'entira Svizra
Suenter il di da chalira questa notg èn ferms urizis sa muventads sur la Svizra ora. Las regiuns cun zunt blers urizis èn stadas il Tessin ed il Gottard, tranter il Lai da Genevra e Berna, ed il Giura. Ils servetschs da l'aura annunzian dieschmillis da chametgs ch'igl ha dà la notg passada en l'entira Svizra.
Suffels da stemprà da fin a 120 kilometers l'ura hai per exempel dà a Wädenswil al Lai da Turitg ed a Steckborn al Lai da Constanza. A Villars-sur-Glâne en il chantun Friburg ha in chametg tutgà ina dunna. Tenor la polizia è ella vegnida transportada cun grevas blessuras en l'ospital. L'unda d'urizis ha era procurà per disturbis a l'eroport a Turitg e sin divers trajects da viafier.