Suenter ils ferms urizis la notg da mesemna sin gievgia, ha la vischnanca da Scuol stuì serrar duas vias communalas. Uss è la via da S-charl puspè averta. Sco la vischnanca da Scuol communitgescha, resta dentant vinavant bloccada la via en la Val d'Uina.
En la Val Poschiavo eran vegnidas a val pliras bovas pervia da la ferma plievgia. Las bovas en la Val Beton sur San Carlo ed en la Val d'Urezza sur il vitg da Poschiavo han sfurzà da serrar la via chantunala. Entant po il traffic puspè passar senza impediments.
Radund 95’000 chametgs en Svizra
Il servetsch da l’aura Meteonews ha registrà cun ses sistem radund 95’000 chametgs aifer 36 uras. Cumpareglià cun l’entir fanadur da l’onn passà èn quai stads 10’000 dapli – lez mais avevi dà 84’727 chametgs. La raschun per il dumber extraordinari dals ultims dus dis è tenor Meteonews ils ferms urizis ch'èn passads successivamain sur l'entira Svizra.
Ils pli blers chametgs hai dà en il chantun Turitg, cun 13’527 chametgs aifer 36 uras. Il Grischun è il chantun cun il terz bler dumber da culps da chametgs.
Dapli aua en ils flums
L'entschatta da l'emna purtavan blers flums en Svizra anc marcantamain damain aua che normalmain. En tscherts lieus saja la situaziun entant sa megliurada in zic, ha declerà Philippe Gyarmati da l’Uffizi federal d’ambient ad SRF. En las Prealps per exempel èn ils livels dals flums per la gronda part puspè sa normalisads. Quai saja per exempel da vesair a la Emme en il chantun Berna. Er ils flums ed ils auals en las regiuns da muntogna mainan il mument surproporziunalmain blera aua. Quai però er pervia dals glatschers che lieuan pli spert.
Las autoritads dal chantun Son Gagl percunter fan quitads pervia da la sitgira, e pondereschan in scumond da prelevar l'aura.
Il mardi avertì d'urizis
Per il mardi saira aveva la Confederaziun publitgà in avertiment, ch'ils urizis spetgads pudessan cuntanscher il pli aut stgalim da privel 4. Tar urizis dal pli aut stgalim da privel èsi da quintar cun donns. L'avertiment ha pertutgà tuttas regiuns da la Svizra.
Tar talas malauras èn plievgias da 30 liters per meter quadrat pussaivlas entaifer in’ura. Granella gronda po vegnir giu. Ins sto quintar cun stemprads da passa 100 kilometers l’ura. La quota da chametgs dastgass esser auta. Ils urizis sa furman tenor MeteoSvizra l’emprim en las muntognas.
La charta dad SRF Meteo aveva mussà il privel en tut la Svizra, auter ch'en la gronda part dal Grischun.
Il pli chaud di fin uss
Uschè chaud sco mardi èsi anc mai stà quest onn en Svizra. A Cuira ha SRF Meteo mesirà cunter suenter mezdi 37 grads. La temperatura da record han ins registrà a Cuira ils 28 da fanadur 1983 cun 38,1 grads.
Or da l'archiv:
