Il favugn burascus impedescha era da dumengia da Pasca il manaschi da sutgeras, pendicularas e da trens. Per exempel na curseschan nagins trens da la Viafier Matterhorn-Gottard tranter Tschamut ed Andermatt.
E sco gia la sonda sforza il favugn era divers territoris da skis en il Grischun dal Nord ed en il Grischun Central da metter ord funcziun sutgeras e pendicularas. Pertutgadas èn cunzunt las regiuns ch’han implants lunsch si en la muntogna, sco per exempel parts da l'Arena Alva e da Savognin.
En pliras regiuns grischunas èn implants da skis stads ord funcziun la sonda
Il stemprà da favugn ha fatg in stritg tras il quint a diversas interpresas dal sport d’enviern en il Grischun. La sonda han cunzunt destinaziuns da skis en il Grischun dal Nord stuì serrar la gronda part u l’entir territori.
Tranter auter èn stadas pertutgadas la regiun da skis da l’Arena Alva (cun Laax, Flem e Falera), divers implants a Mustér ed en Tujetsch, la regiun Lai ed Arosa ed ils territoris da skis da Savognin e da Spleia.
Suffels burascus gia il venderdi sontg
En parts da la Svizra ha buffà il favugn cun forza d’orcan il venderdi sontg. Sin il Gütsch sur Andermatt han ils instruments mesirà suffels cun ina spertezza da 190 kilometers l’ura, e sin il Piz Martegnas sur Savognin da 141 kilometers l’ura. Quai ha communitgà SRF Meteo.
En las valladas han ils suffels era buffà a moda furiusa. Ad Altdorf han ins mesirà ina spertezza da vent da 130 kilometers l’ura. Suffels d’orcan hai era dà ad Oberägeri cun 125 kilometers l’ura. E tras la citad da Cuira hai era sufflà cun fin a 104 kilometers l’ura. Pervi dal stemprà da favugn han pliras pendicularas stuì interrumper lur manaschi.
Il favugn ha purtà temperaturas da bunamain 22 grads, quai ad Altenrhein ed a Kriessern en il chantun Son Gagl. Ed a Lucerna ha il favugn procurà il venderdi sontg la saira la set anc per ina temperatura da 21 grads.
Models quintan cun 180'000 tonnas sablun
Ina gronda part dal tschiel en Svizra è turblà dal sablun da la Sahara. Tenor models da prognosa sa tracti da radund 180'000 tonnas sablun che sa chatta la sonda sur la Svizra, sco il meteorolog Roman Brogli da SRF meteo ha ditg al radio. Quai saja ina quantitad excepziunalmain gronda.
Grisch e bletsch en il sid
Auter ch’en il nord han il Grischun dal Sid ed il Tessin survegnì plievgia u naiv en abundanza. En il Tessin dal Nord han ins mesira il venderdi sontg pli che 30 millimeters en ina u l’autra furma bletscha. E naginas da las staziuns meteorologicas en il Tessin n’han registrà almain ina minuta sulegl.
Nagina midada fin glindesdi
Tenor ils meteorologs da SRF èsi anc da quintar fin glindesdi cun in favugn burascus. La fasa la pli ferma spetgan els fin la sonda da mezdi. En las regiuns en il sid plovi u naivi vinavant per part intensiv.
Declerà curt e cumpact – il favugn: