6'788 francs brutto, quai è la paja mediana da l'onn 2022 en Svizra, vis sur l'entira economia, pia sectur privat e public, quai mussan las cifras da l'Uffizi federal da statistica. Tenor quellas datti grondas differentas tranter ils secturs economics. Ils 10% cun las pajas pli bassas han gudagnà pli pauc che 4'478 francs per mais, quellas e quels cun pajas autas han survegnì 12'178 francs per mais. La forsch tranter las pajas autas e las pajas bassas saja restada stabila, concluda l'uffizi.
Grondas differenzas tranter las branschas
Tgi che fadia quant bler è fitg dependent da la branscha. Uschia datti autas pajas mensilas en il sectur da bancas, l'industria da farma u en la tecnologia d'infurmaziun. Bassas pajas per encunter datti en il sectur da servetschs, alloschament, gastronomia u er commerzi en detagl.
La grafica sut mussa la paja mensila en differents secturs en la regiun da la Svizra Orientala.
Differenzas da paja tranter umens e dunnas prendan giu
L'onn 2022 è stada la differenza da pajas tranter umens e dunnas en media anc tar 9,5%. Tenor las cifras da l'Uffizi federal da statistica èn quai 2 puncts procentuals pli pauc ch'anc avant quatter onns. Las differenzas tranter las schlattainas sa laschian per part declerar cun il nivel da furmaziun u da responsabladad al lieu da lavur, hai num en la communicaziun. En general reflecteschian las differenzas da paja però l'integraziun professiunala differenta da las dunnas e dals umens en il martgà da lavur. Pli aut ch'il stgalim da ierarchia saja però, e pli gronda che la differenza da paja vegnia tranter las duas schlattainas.
La grafica mussa la differenza da paja tranter um e dunna en la regiun da la Svizra Orientala.
Or da l'archiv
En la Marella davart tabus da RTR vegn er discurrì da pajas, tgi gudogna quant e datti forsa inegualitads? In tema che ha savens pli pauc plaz en nossa societad.
