L’onn passà han marcantamain dapli persunas requirì per asil en Svizra. Cumpareglià cun il 2022 saja il dumber da dumondas s’augmentà per 23,3% (+5'712) sin 30’223, communitgescha il Secretariat da stadi per la migraziun (SEM). Las raschuns per quest augment vesa il SEM en trais facturs principals.
Bleras dumondas d'asil cunzunt da la Tirchia
Per l'ina saja il dumber da requirents d'asil da la Tirchia sa dublegià vesì sur l'entir'Europa. En Svizra munta la creschientscha a 2000 requirents dapli. Segundo sajan creschids fitg era ils dumbers da requirents d'asil dal Maroc e da l'Algeria che veglian bandunar lur patria surtut per raschuns economicas, communitgescha il SEM. E tertio haja la Svizra midà pratica vers dumondas d'asil da dunnas e mattas da l'Afganistan. Lasuenter hajan radund 1800 mattas e dunnas da l'Afganistan – ch'eran recepidas provisoricamain – fatg ina nova dumondas d'asil.
Stgars 6000 persunas survegnan asil
26'667 dumondas d'asil haja il Secretariat da stadi per la migraziun decidì en emprim'instanza. Da questa han 5991 persunas (22,4%) survegnì asil. L'uschènumnada «quota da protecziun» – pia las dumondas acceptadas e quellas acceptadas provisoricamain munta a 54,4%. Quai è tenor il SEM pli pauc che l'onn avant, cura che la quota da protecziun muntava anc a 59%.
Bun 23'000 persunas requireschan il status «S»
Il status da protecziun «S» han requirì 23'012 fugitivas e fugitivs da l'Ucraina. Concedì il status ha il SEM a 18'375 persunas (79,8%) e rerfusadas èn 932 persunas. En tut è finì il status «S» en Svizra tar 13'512 persunas e tar ulteriuras 3260 persunas è il status en examinaziun. En tut vivevan la fin da l'onn passà 66'083 fugitivs cun il status «S» en Svizra.
Per quest onn quinta il SEM cun sumegliontas cifras.
