- Il dumber da las repatriaziuns da requirents d'asil refusads da la Svizra è s'augmentà l'onn 2023 per in tschintgavel.
- Pertutgads èn surtut requirents d'asil da l'Algeria.
- Sper ina meglra collavuraziun cun stadis d'origin è tenor il secretariat statal per migraziun SEM er l'augment da las dumondas d'asil in motiv per il dumber augmentà da repatriaziuns.
Il dumber da requirents d'asil, manads enavos da la Svizra en la patria è creschì il 2023 per in tschintgavel. Quai mussan cifras dal Secretariat da stadi per la migraziun SEM. Ina raschun è l'augment general da las dumondas d'asil. Influenzà quest svilup haja dentant era la meglra collavuraziun cun ils stadis d'origin sco l'Algeria – ina premissa per insumma pudair repatriar persunas. Quai a ditg Reto Kormann dal Secretariat da stadi per la migraziun envers SRF.
Tgi che na survegn a la fin da la procedura betg ina resposta positiva sin sia dumonda d'asil u ina admissiun provisorica, sto bandunar il pajais voluntarmain u sfurzadamain. Quai pertutgia surtut persunas or da pajais, dals quals bleras dumondas d'asil vegnian, tar las qualas la vista per asil saja dentant fitg bassa, di Reto Kormann dal secretariat statal per migraziun. «Là tutga per exempel l’Algeria, nua che nus avain pudì repatriar bunamain 500 persunas ch’eran fugidas.» Ma era la Tirchia e la Georgia sajan davanttiers, di Kormann.
Lavur constructiva e cuntinuanta sur onns
Pertutgads spezialmain da repatriaziuns èn requirents d’asil dal Maghreb: Per il solit sa tracti d’umens giuvens. E per il solit fugian quests umans da motivs economics. Lur vista d’asil è marginala, perquai è il SEM spezialmain loschs da la collavuraziun cun l’Algeria. Cundiziun per ina tala collavuraziun sajan stadas onns a la lunga stentas per ina cunvegna da migraziun.
