43% dals bajetgs en il Grischun vegnan stgaudads cun energias fossilas (ieli e gas). Quai mussa la statistica da l'onn 2021 da l'Uffizi federal per statistica. La media svizra è cun 58% pli auta.
Pauc gas e blera laina en Grischun
Cumpareglià cun la media svizra (17,6%) e cun auters chantuns dat en egl ch'i vegn stgaudà fitg pauc cun gas en il Grischun (4,3%). Ieli è dentant vinavant la pli impurtanta funtauna d'energia (38,8%) – saja en il Grischun sco er en l'entira Svizra.
Persuenter stgaudan Grischunas e Grischuns pli savens cun laina (25,5%). Quai è marcantamain sur la media svizra (11,8). L'Uffizi federal da statistica constatescha en general ch'i vegn stgaudà en regiuns da la champagna dapli cun laina ch'en citads.
Adina dapli pumpas da chalira
Sco l'Uffizi federal per statistica scriva stgaudan adina dapli bajetgs cun pumpas da chalira: Tar bajetgs ch'èn vegnids construids da nov ils ultims 10 onns han trais quarts ina pumpa da chalira. En il Grischun è questa cumpart tar 15,9% – pli u main en la media svizra da 17%.
