Che quests stadis veglian explotar damain ieli a partir dal november saja in sbagl e da stretg orizont – quai gist en in temp nua ch’i saja essenzial da garantir il provediment d’energia global. Tenor ina pledadra dal president american Joe Biden prendia Opec+ uschia partida per la Russia. Sco exportadra dad ieli profitass la Russia tenor observaders numnadamain da pretschs pli auts ed ieli stgars.
Opec+ ha argumentà ch’i na giaja betg per las atgnas entradas, mabain per segirar il provediment e la credibilitad. Il cartel da 23 stadis vul stabilisar il pretsch d’ieli ch’è crudà per 30%. Quels stadis controlleschan 40% dal martgà d’ieli da l’entir mund. Tar Opec+ s'audan ils stadis dad Opec ed era alliads sco per exempel la Russia.
Il pretsch per ieli é creschì
Sco reacziun sin quella decisiun è il pretsch per in barrel (159 liters) ieli da la sort da la Mar dal Nord Brent creschì sin 93,06 dollars, quai è 1,25 dollars dapli ch’il mardi. Il pretsch per Brent era creschì il zercladur sin radund 125 dollars e crudà il settember pervia da la tema d’ina recessiun mundiala sut 90 dollars.
