La SRG SSR dovria avunda daners per pudair porscher en tut las regiuns linguisticas ina purschida publicistica equivalenta. Per quest motiv ha il Cussegl federal renvià l'iniziativa populara cun il titel «200 francs bastan». Enstagl propona el da sbassar la taxa pass per pass d'oz 335 sin 300 francs ad onn. Malgrà ch'il Cussegl federal refusescha l'iniziativa vesa el la necessitad d'agir e vul distgargiar finanzialmain chasadas ed interpresas.
Per ils proxims dus onns duai la taxa restar sco enfin qua. En in emprim pass duai ella vegnir sbassada il 2027 sin 312 francs ed en in segund pass lura il 2029 sin 300 francs ad onn. Ina nova concessiun vul il Cussegl federal dar a la SRG SSR pir suenter la votaziun. Perquai prolunghescha el la concessiun vertenta enfin la fin dal 2028.
Cun ils meds finanzials reducids duai la SRG SSR porscher en tut las regiuns linguisticas mo pli programs da radio e da televisiun che fan in «servetsch indispensabel per la generalitad».
SRG SSR beneventa la decisiun
La SRG SSR beneventa la tenuta clera dal Cussegl federal cunter l'iniziativa «200 francs bastan». Ed ella è suenter «No Billag» danovamain pronta da demussar tge valur ch'ella porta a la societad cun ses service public audiovisual. Cun approvar l'iniziativa «200 francs bastan» vegnissan ils meds finanzials da la SRG SSR pli u main smesads. Cun in budget talmain reducì na fiss la SRG SSR cun sia structura decentrala dad oz e sia purschida multifara betg pli finanziabla. Quai fiss in dir culp per la branscha svizra da film, musica, cultura e sport.
La SRG SSR prenda enconuschientscha da la decisiun dal Cussegl federal. Las consequenzas da questa decisiun vegn ella uss ad analisar a fund ed instradar las mesiras necessarias. Ella stat uschia a l'entschatta d'in process da lunga durada. Cler è: en il rom da ses meds finanzials vegn la SRG SSR a far tut il pussaivel per garantir vinavant in service public multifar e d'auta qualitad en tut las parts dal pajais. Sco proxim vegn il parlament a discutar davart l'iniziativa «200 francs bastan».
Tge munta quai per RTR?
Tenor Nicolas Pernet, il directur da RTR, saja il mument anc memia baud per dir tge ch’il sbassament da taxas vul dir per RTR. La direcziun da la SRG SSR haja da lantschar la discussiun co ch’ins pudess spargnar sin livel naziunal. Che RTR è dentant pertutgà da las mesiras da spargn, da quai va Nicolas Pernet actualmain ora. Nua che RTR sto spargnar sappia el pir dir cura ch'ins sappia quant che sto vegnir spargnà.
Tenor il cusseglier federal Albert Rösti pudess la SRG SSR spargnar en ils secturs dal sport e divertiment. Nicolas Pernet percunter di ch’ins na possia betg metter il focus sin singuls champs. Ins stoppia reponderar process interns, l’administraziun, emissiuns e programs. La SRG SSR stoppia far quint cun 15 enfin 20% pli paucas entradas.
Mesiras per sbassar ils custs a curta vista
Pervi da la situaziun finanziala difficila vegn la SRG SSR a prender mesiras da spargn gia a curta vista – independentamain dal sbassament da la taxa da medias decidì dal Cussegl federal. Il motiv èn las entradas da la reclama regressivas e la chareschia. Sin quests svilups durabels vegn la SRG SSR a stuair reagir gia a partir dal 2025.
La Societad Svizra da Radio e Televisiun en cifras
Il rapport annual 2023 da la Societad Svizra da Radio e Televisiun metta tranter auter a lieu las entradas, expensas, investiziuns e pajas.
- Il 2023 ha la SSR retschavì 1,265 milliardas francs or da las taxas da medias che vegnan incassadas da la Serafe
- Sin la fin dal medem onn èn stadas ocuppadas 5'735 plazzas a temp cumplain tar tuttas unitads da la SSR
- Las expensas per pajas ha il medem onn da fatschenta muntà a passa 794 milliuns francs, ils custs per la producziun a bun 393 milliuns francs ed administraziun cun reclama a var 105 milliuns francs.
Suenter ch'il Cussegl federal ha decis han las partidas però er differentas organisaziuns prendì posiziun. Uschia crititgeschan ina part da l'Allianza dal center las partidas da la sanestra ed organisaziuns da cultura e sport la decisiun. Ellas teman surtut che la SRG SSR vegn flaivlentada. La PLD, la PPS e l'Allianza dal center pretendan ina proposta da cumpromiss che va pli lunsch che quella dal Cussegl federal. Ultra da quai pretendan ellas ina discussiun davart tge che la SRG duai prestar. Quai avevan las cumissiuns responsablas gia decis ordavant.
