La Societad svizra da radio e televisiun (SRG SSR) serra l’onn 2023 cun in resultat equilibrà. Operativamain è restà tar entradas sbassantas in gudogn da 2,2 milliuns francs. Lur emetturs han demussà quotas d’auditori stabilas.
L’onn saja stà plain eveniments e pretensius, ha la SSR communitgà venderdi. Malgrà la mancanza d’eveniments gronds da sport, la sminuziun da l’utilisaziun lineara da radio e televisiun e la concurrenza internaziunala saja la part dal martgà restada stabila. 83% da la populaziun activa en l’internet a partir da 15 onns nizzegia almain ina giada l’emna ina purschida da la SSR.
Ch’i resultia – malgrà las entradas da reclama che sa sminueschian vinavant – in gudogn operativ da 2,2 milliuns francs, ha la gestiunaria dals programs svizzers da radio e televisiun renvià ad ina planisaziun da finanzas prudenta. La qualitad da sia rapportaziun ha la SSR taxà sco auta. Las emissiun giaudan vinavant la confidenza dal public ed èn a la testa da glistas da qualitad.