Tar la societad aviatica Swiss è mintga 6avla plazza periclitada quai malgrà il sustegn finanzial da milliardas da la Confederaziun. La Swiss sto spargnar en connex cun la crisa da corona e passa 1'500 da las total 9'500 plazzas sajan perquai periclitadas. Quai rapporta la Sonntagszeitung.
Cun nizzegiar la fluctuaziun natirala e laschar ir pli baud en pensiun na saja la reducziun betg da dumagnar. Las mesiras da spargn èn ina part da la cunvegna da la Swiss cun la Confederaziun e cun las bancas. La Confederaziun quinta che la Swiss possia entschaiver mo plaunet da puspè sgular.
