La Swiss ha stritgà tut ils sgols en ed ord la China enfin ils 9 da favrer. Quai pervi dal nov virus da Corona che sa derasia, sco la Lufthansa, il concern-mamma da la Swiss, ha communitgà. Er las ulteriuras societads affiliadas na sgolian durant quest temp betg pli en China. Sgols a Hongkong na sajan percunter betg pertutgads.
Durant temp regular sgola la Swiss radund set giadas l'emna a Shanghai e tschintg giadas l'emna a Peking. Tut en tut stritgia la Swiss 32 sgols da ed a Peking e Shanghai, ha declerà la pledadra da la Swiss sin dumonda da l'agentura AWP. Pertutgads sajan radund 4'000 passagiers. Las societads aviaticas sgolian uss anc in’ultima giada en la China per che passagiers e las crews possian returnar en l’Europa.
Gia ordavant avevan British Airways ed America Airlines annunzià da stritgar lur sgols en ed ord la China.
RTR novitads 18:00