La banca svizra Credit Suisse serra enfin la fin favrer 14 da 109 filialas en Svizra. Quai è dapli che mintga 10avla filiala. In pledader da la banca ha confermà envers l’agentura da novitads Keystone-SDA in rapport dal portal da finanzas «Finews». Tge filialas che ston serrar n’è anc betg enconuschent.
La raschun che la banca serria filialas saja che la clientella haja midà ses cumportament: Adina pli savens dovria quella purschidas online.
La Credit Suisse stritga 540 plazzas en Svizra
Avant prest duas emnas ha la banca Credit Suisse preschentà sia nova strategia per chattar la via ord la crisa suenter numerus scandals e sperditas da milliardas. In punct central da la nova strategia da la banca gronda è da reducir persunal ed uschia spargnar custs.
Fin il 2025 prevesa la CS da stritgar 9'000 plazzas da lavur. Gia fin la fin da quest onn vegnian 2’700 plazzas da lavur stritgadas – da quellas 540 en Svizra. Quai ha ditg il schef da la banca, Ulrich Körner, en in’intervista cun la «NZZ am Sonntag».
Radund la mesadad da las plazzas duajan crudar davent via la fluctuaziun natirala, uschia Körner. En Svizra lavurian radund 16'000 persunas per la banca. Durant ils proxims trais onns vegnia quest dumber reducì sin radund 14'000, aveva ditg dacurt il president dal cussegl d’administraziun, Axel Lehmann envers SRF.
