La lescha ch'il Cussegl naziunal ha approvà prevesa ch'acquisiziuns d'interpresas svizras tras investurs da l’exteriur pon vegnir controlladas meglier. Finamira è da pudair impedir che persunas u interpresas da l’exteriur surprendan infrastructuras u savida critica che po periclitar l’urden public u la segirtad da la Svizra.
Lescha pertutga er investurs privats da l'exteriur
Ils adversaris han argumentà adumbatten che la lescha saja memia stricta cunquai ch’ella na resguardia betg mo investurs statals, mabain er investurs privats. Ultra da quai sajan memia blers secturs vegnids numnads sco critics per la segirtad da la Svizra.
Ils adherents èn dentant era persvadì ch’i saja impurtant d'avair en egl ils investurs privats. Savens na saja betg pussaivel d’identifitgar las persunas u ils stadis davos singuls investurs. Il dumber da secturs pertutgads na saja era betg stravagà, mabain correspundian als criteris definids. Sco proxim tracta il Cussegl dals chantuns la lescha.
