30 onns èsi passà dapi che las autoritads n'han betg pli acceptà la scena da drogas averta a l'anteriura staziun da tren Letten, sper il flum Limmat a Turitg. La polizia ha serrà giu l’areal cun filfier cun spinas – Letten era pia betg pli accessibel per las persunas dependentas da drogas. Las persunas sez avevan betg gust vi da questa novitad.
Ina ch'ha era consumà al Letten ha avant 30 onns dà in’intervista ad SRF e ditg ch'ella stoppia uss ponderar tge far e quai saja in squitsch. En pli chattia ella mal che las drogas vegnian pli charas e ch’ella stoppia commetter dapli delicts per pudair cumprar drogas. In auter ha ditg che las persunas sajan gnervusas ed ils dealers sajan agressivs ed hajan augmentà ils pretschs per anc far daners ils ultims dis.
Per mai persunal fa quai in squitsch che jau mid mia situaziun.
La scena da drogas al Letten s’ha furmada suenter che il parc dal Platzspitz è vegnì serrà il 1992. Durant trais onns è sa furmà in dischurden sin ils binaris. Sur 1’000 persunas arrivan di per di per consumar. Il terren è zuglià cun squittas duvradas per heroin, cun rument e cun excrements.
-
Bild 1 von 2. Suenter che la scena da drogas averta a l'anteriura staziun Letten a Turitg è serrada vegn nettegià l'areal. Bildquelle: Keystone.
-
Bild 2 von 2. La polizia ha serrà l’areal cun filfier cun spinas, uschia che las persunas dependentas han betg pli access al Letten. Bildquelle: Keystone.
Las persunas ch'han vivì da quest temp en vischinanza u che èn passadas tar la scena da drogas èn cuntentas ch'igl è sa mida insatge al Letten. Uss è l’ur dal flum in parc idillic ed in lieu per star a l'aua. Durant la rumida ha era il chantun sustegnì cun porscher plazzas da praschuns e policists ch’èn stads a disposiziun. La rumida ha attratg attenziun da tuttas varts. Durant la notg eran al lieu medias da la Germania, Austria, Frantscha, ils Stadis Unids e perfin dal Giapun. In motiv che la rumida aveva success saja stà che las persunas dependentas èn vegnidas tramessas enavos en lur vischnancas. Il Grischun ha fatg quint cun 50 fin 60 persunas che turnan dal Letten enavos en il Grischun.
Ord l'archiv
Politica da drogas en Svizra
La politica da drogas svizra è sa midada fitg dapi ils onns 1970. Tut ha cumenza il 1924 cun l'emprima lescha da narcotics. Da lez temp eran mo l'opium ed il cocain scumandads. Cannabis è vegnì agiuntà a la glista pir il 1951. En ils onns 1960 è il consum da drogas daventà in simbol da rebelliun per la giuventetgna. Sco reacziun ha la Svizra fatg las leschas pli restrictivas e scumandà il 1975 il consum da cannabis. En ils onns 1980 èn sa furmadas scenas avertas da drogas, surtut a Turitg ed a Berna. Quests lieus da consum public da drogas èn vegnids serrads a l'entschatta dals onns 1990.
En quest temp ha il Cussegl federal introducì sia «strategia da quatter pitgas»: prevenziun, terapia, reducziun da donns e repressiun. In'approximaziun equilibrada tranter scumond e liberalisaziun. Il 1992 è vegnì fatg in pass impurtant: L'entschatta da la distribuziun controllada da heroin a persunas cun greva dependenza. Il pievel svizzer ha votà trais giadas davart la dumonda da las drogas. Il 1997 ed il 1998 ha el refusà dus iniziativas cun approximaziuns cuntrarias: ina per ina politica pli repressiva, l'autra per ina liberalisaziun. Il 1999 han ils burgais approvà la prescripziun medicinala da heroin. Suenter pliras emprovas da revisiun vegn ina nova versiun da la lescha davart ils meds narcotics acceptada en la votaziun dal pievel il 2008. Ella fixescha en la lescha la politica da las quatter pitgas e la prescripziun da heroin, ma mantegna il scumond da cannabis.