La Confederaziun na vul betg mo spargnar, mabain era auzar las entradas da taglia. Almain tar il provediment per la vegliadetgna. Per retrair chapital or da la segunda e terza pitga duai dar pli autas tariffas. Las propostas concretas èn en consultaziun en il «pachet da distgargia 27».
Cussegl federal prenda en mira persunas cun buna paja
Las calculaziuns da l'administraziun da taglia mussan che la Confederaziun vul taxar pli aut oravant tut persunas cun buna paja u auta facultad. Pia quels ch'han emplenì bain la segunda e terza pitga dal provediment.
Tgi che retira 1 milliun francs chapital da la cassa da pensiun, paja actualmain 23'000 francs taglia federala. En il futur pudess quai custar passa 42'000 francs.
Taxar pli fitg retratgas da milliuns
In manager ch'ha schizunt 10 milliuns en la segunda pitga e vul retrair tut stuess pajar 488'000 francs dapli taglia che fin uss.
Ed era per summas pli pitschnas s'augmenta la taglia. Per schliar ina terza pitga cun 100'000 francs pajan ins actualmain 547 francs (in pèrin maridà 372 francs). Da nov stuess ins pajar 595 francs, pia 48 francs dapli.
Taglia individuala per tuts
I po dentant era dar ch'ins spargna, entras ina midada dal sistem. En il futur duain era las retratgas d'in pèrin maridà vegnir calculadas individualmain. Sch'in pèrin schlià ensemen dus contos da terza pitga cun 100'000 francs, pajan els actualmain ensemen 2'414 francs taglia. En il futur fiss quai 1'200 francs, pia mo pli la mesadad. Fin a retratgas da 300'000 francs profitassan pèrins maridads da la midada da sistem, tar pli autas summas vegnan las taxas era pli autas.
La finamira da la midada da sistem è sper generar dapli entradas per la Confederaziun era da reducir privilegis da taglia. Daners ch'ins paja en il provediment da vegliadetgna profitescha traidubel da reducziuns da taglia. Ins po trair giu da las entradas quai ch'ins metta en la segunda e terza pitga. Plinavant quinta quai chapital betg per taglias sin chapital da spargn. E sch'ins retira il chapital enstagl da laschar pajar ora sco renta na stons betg taxar quai sco entradas.
Ils privilegis datti perquai ch'il stadi vul motivar da spargnar per la vegliadetgna, entras quai na dovran persunas pensiunadas pli paucas prestaziuns supplementaras u auter sustegn finanzial dal stadi.
Midada be sin palancà federal
La midada pertutga be las tariffas federalas, las taglias chantunalas na sa midan entras quai betg. Il parlament sto acceptar las propostas – e tut tenor decida la fin la populaziun.
Tar ils chantuns datti grondas differenzas quant fitg che la retratga da chapital vegn taxada. Il «Tagesanzeiger» ha retschertgà e constatà ch'igl èn oravant tut ils chantuns da la Svizra Orientala e Centrala ch'han bassas taxas. Per part èsi era vegnì fatg reclama explicita per carmalar pensiunads en il chantun – il chantun Sutsilvania ha per exempel scrit a divers fiduziaris ed accentuà ils avantatgs da taglia en il chantun.
En la charta qua sut èn las differenzas da las vischnancas grischunas nudadas. Il pli favuraivel èsi da retrair chapital a Rongellen – là ston ins be dar giu 4,8% da la summa sco taglia. Quai è era la pli bassa valur da l'entira Svizra.
