- En il Vallais hai dà in Na a la nova constituziun chantunala. La nova constituziun avess tranter auter augmentà il dumber da commembras e commembers en il Cussegl guvernativ e midà la clav da represchentaziun dal Vallais sura. Pia resta en il Vallais la veglia constituziun da l'onn 1907.
- Ils Turitgais e las Turitgaisas vulan la prolungaziuns da las pistas da la plazza aviatica. Anc n'èn betg tuttas vischnancas dumbradas ora. Ils resultats enfin ussa èn però clers. La plazza aviatica po prolungar duas pistas per mintgamai 400 meters e 280 meters. Ils custs da 250 milliuns francs porta l'eroport sez.
- A l'iniziativa «cunter chaots» hai plinavant dà in Na. La cuntraproposta, che prevesa ch'organisaturas ed organisaturs da demonstraziuns ston pajar per donns materials, è dentant approvada. Sche donns vegnan fatgs intenziunadamain pajan organisaturas ed organisaturs pia per ils donns che vegnan chaschunads tar la demonstraziun.
- A Soloturn è in'iniziativa da reducir il dumber d'emploiadas ed emploiads chantunals vegnida refusada cun 55% da las vuschs.
- A Genevra èn main suttascripziuns necessarias per lantschar in'iniziativa chantunala.
- En il chantun Friburg duain ils manaschis da transport daventar pli ecologics. Fin l'onn 2030 vulan las interpresas da traffic investir bunamain 600 milliuns francs en ina mobilitad pli persistenta.
- En il chantun Zug han las votantas ed ils votants ditg ina segunda giada cleramain Na ad in tunnel per la citad da Zug. Er il tunnel ad Unterägeri è restà senza schanzas.
Elecziuns chantunalas
- La cussegliera da l'Allianza dal Center Céline Huber ha fatg il sigl en la regenza dad Uri. Suenter quatter onns è cunquai puspè ina dunna en il cussegl che sa cumpona da set commembras e commembers. Quatter èn enfin uss vegnids reelegids, per ulteriurs dus sezs è necessari in segund scrutini.
- En il chantun Glaruna pudess la PLD perder in sez en il Cussegl guvernativ. I dovra in segund scrutini, il candidat da la PLD ha dentant fatg las pli paucas vuschs. Las pli bleras vuschs ha enfin uss Daniela Bösch da l'AdC. I vegn elegì la successura u il successur da cusseglier guvernativ Benjamin Mühlemann (PLD).
- A Son Gagl èn las tschintg cusseglieras e cussegliers guvernativs en uffizi vegnids reelegids. Per ils dus ulteriurs sezs datti in segund scrutini. Ils dus candidats da la PPS han survegnì las pli bleras vuschs, dentant betg cuntanschì il pli absolut.
- En il chantun Sviz resta il Cussegl guvernativ burgais. Tut las set commembras ed ils commembers èn sa mess a disposiziun per las elecziuns. La PS n'ha betg dumagnà da reconquistar il sezs en la regenza ch'ella ha pers avant 12 onns.
- En il chantun Basilea Citad n'ha nagin dals candidats cuntanschì il pli absolut per il sez en la regenza. En la cursa èn Mustafa Atici da la PS e Luca Urgese da la PLD. Er il candidat per il presidi da la regenza Conradin Cramer (LDP) sto ir en il segund scrutini, quel è ils 7 d'avrigl.
