68,7% da las votantas e votants han ditg Gea a la lescha d'electricitad. La lescha duai stgaffir la basa ch'ins po producir dapli electricitad or da funtaunas regenerablas. Cunter quest project avevi dà in referendum.
Lescha d'electricitad
Svizra: Lescha federala davart in provediment d'electricitad segir cun energias regenerablas
-
GEA
1'717'387 Vuschs
-
NA
781'769 Vuschs
Che la lescha d'electricitad è vegnida acceptada, n'è nagina surpraisa. En las ultimas retschertgas da votaziun per incumbensa da la SRG è vegnì spetgà in Gea da 73%. La lescha duai ir en vigur l'entschatta dal 2025.
Il Cussegl federal, il parlament, las bleras partidas grondas, sco er uniuns d'ambient èn sa mess tras. La fundaziun Franz Weber ha cumbattì il project cun in referendum. Era la PPS è stada encunter, cun excepziun d'intginas partidas chantunalas.
Reacziuns
La gronda part da las partidas, diversas uniuns per l'ambient e l'economia svizra sa legran dal cler Gea da la populaziun svizra. In pass impurtant ad in provediment d'energia segir saja cuntanschì, din els.
- «Per il provediment d'electricitad en Svizra èsi franc stà in bun di», ha Christian Imark, in da plirs co-presidents da l'Allianza per in provediment d'electricitad segir, ditg sin dumonda a l'agentura da novitads Keystone-SDA.
- La PLD ed ils Verdliberals han discurrì da pass impurtants per l'avegnir d'energia. Ils Verds sajan «ordvart cuntents» e la PS discurra d'ina «victoria per la protecziun dal clima e la segirtad da provediment en Svizra». I saja «fitg allegraivel» ch'il suveran haja approvà in «project equilibrà», ha scrit l'Allianza dal Center.
- La partida populara svizra vegnia a controllar bain, sche l'electricitad vegnia entras la construcziun d'energias regenerablas pli chara, ha ditg il cusseglier naziunal da la PPS Thomas Knutti sin dumonda da l'agentura da novtiads Keystone-SDA. La PPS vegnia er ad examinar, sch'il dumber maximal da 150 fin 200 rodas da vent ch'ils aderents han numnà, vegnia resguardà.
En la gronda part da las posiziuns hai però er gì num che cun il Gea na saja anc betg fatg tut. I dovria ulteriurs pass.
Grischun di Gea a la lescha d'electricitad
Suenter che tut las 101 vischnancas grischunas han dumbrà las vuschs, din bun 65% Gea e bun 35% Na a la lescha d'electricitad. La participaziun da votaziun è tar bun 41%.
Bunamain tut las vischnancas grischunas han votà per la lescha d'electricitad. Il pli cler Gea hai dà cun bunamain 81% or da la Val S. Pieder. Na han fin uss be votà Küblis, Rothenbrunnen, Schmitten, Rongellen ed Avers.
