La renovaziun dal provediment d'electricitad en l'Europa e conflicts internaziunals pon manar a stretgas durant ils mais d'enviern, sch'ins na po betg importar avunda electricitad. Ultra da quai dovra la Svizra dapli electricitad per exempel per l'economia, ma er per autos electrics e pumpas da chalur. Per garantir la segirezza dal provediment ha il parlament perquai acceptà cleramain la lescha federala davart in provediment d'electricitad segir cun energias regenerablas. Cunter quella ha dentant il timun da la «Fondation Franz Weber» fatg in referendum. Perquai vegn la lescha uss a l'urna.
La lescha d'energia destrueschia la natira e flaivlentia ils dretgs democratics. Da quest avis è la «Fondation Franz Weber» e l'uschenumnà comité da natira.
D'in'autra opiniun èn tranter auter 18 organisaziuns da l'ambient svizras. Per ellas è la nova lescha d'energia planisada in element central per la protecziun dal clima.
Il Cussegl federal ed il parlament recumondan d'acceptar la lescha davart il provediment d'electricitad. En il Cussegl naziunal èn 177 commembras e commembers s'exprimids a favur da la lescha – 19 cunter. En il Cussegl dals chantuns è il project vegnì acceptà cun 44 cunter 0 vuschs.
